१० हजार ५०० कोटींच्या खर्चाला मान्यता; कामांना लवकरच सुरुवात
येस न्यूज नेटवर्क: पुणे शहरातील वाढती वाहतूक कोंडी कमी करण्यासाठी महाराष्ट्र राज्य रस्ते विकास महामंडळामार्फत (एमएसआरडीसी) हाती घेण्यात आलेल्या पुणे वर्तुळाकार रस्ता (रिंगरोड) प्रकल्पाला मोठी गती मिळाली आहे. प्रकल्पातील नऊपैकी सहा टप्प्यांचे काम सुरू असून सद्यस्थितीत सुमारे ४५ टक्के काम पूर्ण झाले आहे. दरम्यान, उर्वरित तीन टप्प्यांसाठी तब्बल १० हजार ५०० कोटी रुपयांच्या खर्चाला राज्य शासनाने मंजुरी दिली आहे.
पुणे शहरातील अंतर्गत वाहतूक कोंडी कमी करण्यासोबतच शहराबाहेरील जड वाहतूक वळविण्याच्या उद्देशाने हा प्रकल्प हाती घेण्यात आला आहे. एमएसआरडीसीने सुमारे १६८.६०५ किलोमीटर लांबीचा रिंगरोड प्रस्तावित केला असून त्यासाठी मोठ्या प्रमाणावर निधीची तरतूद करण्यात आली आहे.
सहा टप्प्यांचे काम वेगात
रिंगरोड प्रकल्पातील नऊ टप्प्यांपैकी सहा टप्प्यांचे काम सध्या वेगाने सुरू आहे. मात्र सोरतापवाडी (वळती)–पुणे-सोलापूर रस्ता, शाश्वरे–पुणे-सातारा रस्ता आणि संबंधित उर्वरित तीन टप्प्यांचे काम रखडले होते. या कामांसाठी आता राष्ट्रीय महामार्ग प्राधिकरणाकडून (NHAI) काम करण्याचा निर्णय घेण्यात आला आहे.या तीन टप्प्यांसाठी आवश्यक खर्चाचा प्रस्ताव राज्य शासनाच्या प्रशासकीय मंजुरीसाठी पाठविण्यात आला होता. शासनाने या प्रस्तावाला मंजुरी दिल्याने पुढील निविदा व प्रत्यक्ष कामाचा मार्ग मोकळा झाला आहे.
मार्च २०२८ पर्यंत प्रकल्प पूर्ण करण्याचे नियोजन
सध्या सुरू असलेल्या टप्प्यांचे काम मार्च २०२८ पर्यंत पूर्ण करण्याचे उद्दिष्ट असल्याची माहिती अधिकाऱ्यांनी दिली आहे. उर्वरित तीन टप्प्यांची कामे शक्य तितक्या लवकर सुरू करून नोव्हेंबर २०२८ पर्यंत पूर्ण करण्याचे नियोजन असल्याचेही सांगण्यात आले आहे.रिंगरोड पूर्ण झाल्यानंतर पुणे शहरातील वाहतूक कोंडी कमी होण्यासोबतच शहरात प्रवेश न करता बाहेरील मार्गाने जाणाऱ्या वाहनांसाठी पर्यायी मार्ग उपलब्ध होणार आहे. त्यामुळे पुणे महानगर परिसरातील वाहतूक व्यवस्थेला मोठा दिलासा मिळण्याची अपेक्षा आहे.
