एक रविवार गावासाठी उपक्रमांतर्गत गाव तलाव सुशोभीकरणाला प्रारंभ.
सोलापूर : निमा संघटना आणि हरित धारा ग्रुपच्या वतीने बीबीदारफळ येथील गाव तलाव व परिसरात १२५ झाडांचे वृक्षारोपण करून प्रत्येक झाडाला ट्रीगार्ड बसविण्यात आले.
‘एक रविवार गावासाठी’ या उपक्रमांतर्गत ३४ व्या रविवारी ग्रामस्थ आणि निमा सोलापूरच्या माध्यमातून वृक्षारोपण करण्यात आले. गाव तलावाच्या काठाला देशी औषधी तसेच शोभिवंत झाडे लावून परिसराच्या सुशोभीकरणाच्या कामालाही सुरुवात करण्यात आली.
निमा संघटनेकडून सामाजिक बांधिलकी म्हणून विविध सामाजिक उपक्रम दरवर्षी राबविण्यात येतात. गतवर्षी उळे , शेळगी , बोरामणी परिसरात वृक्षलागवड करण्यात आली होती व त्यांचे संगोपन ही केले जाते.
यावर्षी सुमारे 500 झाडे संघटनेकडून लावण्याचा संकल्प असून रविवारी 125 झाडे ट्री गार्ड सह लावण्यात आली.
यावेळी निमा डॉक्टरांकडून बिबी दारफळ युवकांनी राबविलेल्या ग्रामस्वच्छता, अभ्यासिका, स्मशानभूमी सुशोभीकरण आदी उपक्रमाची माहिती घेऊन माहिती घेतली व पुढील कामासाठी सहकार्य करण्याचे आश्वासन दिले.
यावेळी निमा माजी राष्ट्रीय अध्यक्ष डॉ. विनायक टेंभुर्णीकर, निमा सोलापूर अध्यक्ष डॉ. नागनाथ जीड्डीमनी, निमा वुमन फोरम अध्यक्ष डॉ. श्रुती मराठे, डॉ. साहेबराव गायकवाड, डॉ. रवि गायकवाड, डॉ. अभिजित पुजारी, डॉ. प्रवीण ननवरे, डॉ. अमीर कोटनाळ, डॉ. राजश्री मठ, डॉ. अनुश्री मुंडेवाडी, डॉ. आश्विनी देगांवकर, डॉ. शुभदा देशपांडे, डॉ. सारिका होमकर, पंचायत समिती सदस्य सुनीता बारस्कर, सामाजिक कार्यकर्ते शैलेश साठे, ग्रामपंचायत अधिकारी सचिन शिंदे तसेच ‘एक रविवार गावासाठी’ या टीमने परिश्रम घेतले.
पर्यावरण संवर्धनासोबतच गाव तलाव परिसर हिरवाईने नटविणे आणि आयुर्वेदिक औषधी वनस्पती लागवडीस प्रोत्साहन देणे या उद्देशाने हा उपक्रम राबविण्यात आला.
