फौजदार चावडी पोलिसांची कारवाई; 80 हजार रुपयांचे सोन्याचे मिनी गंठण हस्तगत
सोलापूर : शहरातील एसटी स्टँड परिसरात बसमध्ये चढताना व उतरताना होणाऱ्या गर्दीचा फायदा घेत प्रवाशांचे मौल्यवान दागिने व मोबाईल चोरणाऱ्या चोरट्याचा फौजदार चावडी पोलिसांनी पर्दाफाश केला आहे. पोलिसांनी उमेर अफसर शेख याला ताब्यात घेत त्याच्याकडून सुमारे 80 हजार रुपये किमतीचे सोन्याचे मिनी गंठण हस्तगत केले आहे.
एसटी स्टँड परिसरातील चोरीच्या घटना उघडकीस आणण्याच्या सूचना वरिष्ठ अधिकाऱ्यांनी दिल्यानंतर गुन्हे शाखेच्या पथकाने तपास सुरू केला होता. वरिष्ठ पोलीस निरीक्षक अरविंद माने यांच्या मार्गदर्शनाखाली सहायक पोलीस निरीक्षक दत्तात्रय काळे व त्यांच्या पथकाने ही कारवाई केली.दरम्यान, 8 सप्टेंबर 2026 रोजी पोलिसांना गुप्त बातमीदारामार्फत माहिती मिळाली की, दोन नंबर एसटी स्टँडसमोरील परिसरात एक इसम चोरी केलेले सोन्याचे दागिने विक्री करण्यासाठी येणार आहे. त्यानुसार पोलिसांनी सापळा रचून उमेर अफसर शेख याला ताब्यात घेतले.
सुरुवातीला त्याने पोलिसांची दिशाभूल करण्याचा प्रयत्न केला. मात्र, पोलिसांनी अधिक विश्वासात घेऊन चौकशी केली असता त्याने 2024 मध्ये सोलापूर एसटी स्टँडवर बसमध्ये चढताना गर्दीचा फायदा घेऊन एका महिलेच्या पर्समधील सोन्याचे मिनी गंठण चोरल्याची कबुली दिली.पोलिसांनी त्याच्याकडून 80 हजार रुपये किमतीचे सोन्याचे मिनी गंठण हस्तगत केले असून, या कारवाईमुळे एसटी स्टँड परिसरातील प्रवाशांच्या मौल्यवान वस्तू चोरणाऱ्या टोळीवर मोठा अंकुश बसण्याची शक्यता आहे.
ही कारवाई पोलीस आयुक्त एम. राजकुमार, पोलीस उपआयुक्त अश्विनी पाटील पाटील, सहायक पोलीस आयुक्त दिलीप पवार यांच्या सूचनेनुसार वरिष्ठ पोलीस निरीक्षक अरविंद माने यांच्या मार्गदर्शनाखाली स.पो.नि. दत्तात्रय काळे, हाजीमलिंग शेख, अनिल नाथ, रामेश्वर साडे, कल्पना देवळे व शंकर पवार यांच्या पथकाने केली.
