टिळक रोड परिसरात टीव्ही मुलाखतीदरम्यान हल्ला; हल्लेखोरांची ओळख अद्याप स्पष्ट नाही
पुणे, दि. ३ सप्टेंबर : गणेशोत्सवातील डीजे आणि कर्णकर्कश ध्वनीप्रदूषणाविरोधात ठाम भूमिका घेतल्याने गेल्या काही दिवसांत राज्यभर चर्चेत आलेले विद्यानंद बापट यांना बुधवारी पुण्यात कथितपणे मारहाण करण्यात आली. टिळक रोड परिसरात एका वृत्तवाहिनीशी संवाद सुरू असताना काही तरुणांनी त्यांच्यावर हल्ला केल्याची माहिती समोर आली आहे.
प्राथमिक माहितीनुसार, टिळक रोडवरील कशाळे चौक परिसरात बापट हे नागरिकांच्या प्रतिक्रिया जाणून घेत असताना एका वृत्तवाहिनीशी संवाद साधत होते. यावेळी काही तरुणांनी त्यांना बोलू न देता मारहाण केल्याचा आरोप करण्यात आला आहे. हल्लेखोर नेमके कोण होते आणि कोणत्या संघटनेशी संबंधित होते, याबाबत अद्याप अधिकृत माहिती स्पष्ट झालेली नाही. पोलिसांकडून घटनेचा तपास सुरू असल्याचे वृत्त आहे.
कोण आहेत विद्यानंद बापट?
विद्यानंद बापट हे पुण्यातील नारायण पेठ परिसरातील रहिवासी असून ते बीपीओ क्षेत्रात कार्यरत आहेत. कोणतीही मोठी राजकीय पार्श्वभूमी नसताना त्यांनी गणेशोत्सवातील डीजे, कर्णकर्कश लाऊडस्पीकर आणि ध्वनीप्रदूषणाच्या विरोधात आक्रमकपणे भूमिका मांडली. पुणे महापालिकेच्या गणेशोत्सवपूर्व बैठकीत त्यांनी डीजेवर बंदी घालण्याची मागणी केल्यानंतर ते चर्चेत आले.
बापट यांची नेमकी भूमिका काय?
बापट यांनी गणेशोत्सवालाच विरोध नसून उत्सवाच्या नावाखाली होणाऱ्या ध्वनीप्रदूषणाला विरोध असल्याचे स्पष्ट केले आहे. डीजे, मोठ्या आवाजातील लाऊडस्पीकर, ढोल-ताशे किंवा इतर कोणत्याही माध्यमातून होणारे ध्वनीप्रदूषण नागरिकांच्या आरोग्याला आणि वैयक्तिक स्वातंत्र्याला बाधक ठरत असल्याचे त्यांचे म्हणणे आहे. त्यांच्या आक्रमक व मुद्देसूद भाषाशैलीमुळे ते सोशल मीडियावर अल्पावधीत प्रसिद्ध झाले असून पुणेकरांनी त्यांना उत्तम प्रतिसाद दिला होता.
बापट यांच्या भूमिकेशी असहमती असू शकते, त्यांच्या विचारांना विरोधही होऊ शकतो; मात्र लोकशाहीत मतभेदांना उत्तर विचारांनी आणि संवादातून देणे अपेक्षित असताना मारहाणीचा मार्ग स्वीकारला गेल्याने या घटनेवर तीव्र प्रतिक्रिया उमटत आहेत.
