सोलापूर : भारताच्या ८०व्या स्वातंत्र्य दिनाच्या पार्श्वभूमीवर केंद्र शासनाच्या ‘हर घर तिरंगा’ अभियानांतर्गत सोलापूर महानगरपालिकेच्या वतीने शुक्रवार, दि. १४ ऑगस्ट २०२६ रोजी सकाळी सायकल रॅलीचे आयोजन करण्यात आले. देशभक्तीचा संदेश, पर्यावरण संवर्धन तसेच सायकल वापरातून निरोगी जीवनशैलीचा संदेश देणाऱ्या या रॅलीला सोलापूरकरांचा उत्स्फूर्त प्रतिसाद मिळाला. सोलापूर महानगरपालिका आवारातून सकाळी ठीक ६.०० वाजता रॅलीला सुरुवात झाली. उपमहापौर ज्ञानेश्वरी महेश देवकर, स्थायी समिती सभापती रंजीत चाकोते व कामगार व समाजकल्याण सभापती श्रद्धा पवार, गटनेत्या वहिदा शेख यांच्या हस्ते हिरवा झेंडा दाखवून सायकल रॅलीचा शुभारंभ करण्यात आला.
रॅलीच्या प्रारंभी उपस्थितांच्या वतीने ‘वंदे मातरम्’ या राष्ट्रीय गीताला १५० वर्षे पूर्ण झाल्याच्या निमित्ताने सामूहिक गायन करण्यात आले. यावेळी संपूर्ण परिसर देशभक्तीच्या वातावरणाने भारावून गेला होता. सायकल रॅलीचा मार्ग सोलापूर महानगरपालिका आवार – पार्क चौक – भैय्या चौक – छत्रपती शिवाजी महाराज पुतळा, शिवाजी चौक – नवी पेठ – लकी चौक – किल्ला बगीचा परिसर – पार्क चौक – डफरीन चौक – सोलापूर महानगरपालिका आवार असा होता. विविध भागांतून मार्गक्रमण करत रॅलीची सांगता पुन्हा महानगरपालिका आवारात झाली.
यावेळी उपमहापौर ज्ञानेश्वरी महेश देवकर यांनी उपस्थित सायकलप्रेमी, नागरिक, अधिकारी व कर्मचाऱ्यांना स्वातंत्र्य दिनाच्या शुभेच्छा दिल्या. तसेच देशभक्तीसोबतच पर्यावरण संरक्षण, प्रदूषणमुक्त शहर आणि निरोगी सोलापूर यासाठी सायकलचा अधिकाधिक वापर करण्याचे आवाहन केले. स्थायी समिती सभापती रंजीत चाकोते यांनी रॅलीत सहभागी झालेल्या सर्व सायकलप्रेमी, नागरिक, अधिकारी व कर्मचाऱ्यांना शुभेच्छा देत, अशा उपक्रमांमुळे नागरिकांमध्ये देशप्रेम, सामाजिक बांधिलकी आणि आरोग्याविषयी जागरूकता निर्माण होत असल्याचे नमूद केले. सायकल रॅलीच्या माध्यमातून ‘हर घर तिरंगा’ अभियानाचा संदेश घराघरात पोहोचविण्यासोबतच पर्यावरण संवर्धनाबाबत जनजागृती होत असल्याचे त्यांनी सांगितले.
यावेळी स्थापत्य समिती सभापती विजय चिप्पा, नगरसेविका वाहिदा शेख, नगरसेवक प्रशांत पल्ली, उपायुक्त सोनाली यादव, मुख्य लेखापाल रत्नराज जवळगेकर, प्रशासन अधिकारी माने, सहाय्यक आयुक्त युवराज गाडेकर, समाज विकास अधिकारी अजित खानसोळे, लाईट विभाग अधीक्षक इंगळे, उद्यान विभाग अधीक्षक कोमल काशीद, पर्यावरण संवर्धन अधिकारी अक्षय मोरे, पशुसंवर्धन अधिकारी सतीश चौगुले, पर्यावरण अधिकारी स्वप्निल सोलंकर यांच्यासह सोलापूर महानगरपालिकेचे अधिकारी, कर्मचारी व सायकलप्रेमी मोठ्या संख्येने उपस्थित होते. सदर सायकल रॅलीच्या आयोजनासाठी रॉयल रायडर्स सायकलिंग असोसिएशन, सोलापूरचे प्रमुख अभिनय बावठणकर यांनी मोलाचे सहकार्य केले.
रॅलीनंतर सहभागी सभासद व सायकलप्रेमींसाठी महानगरपालिका आवारात चहा, बिस्कीट व केळीची व्यवस्था करण्यात आली होती.
‘हर घर तिरंगा’, देशभक्ती, निरोगी जीवनशैली आणि पर्यावरण संवर्धन असा त्रिसूत्री संदेश देणारी ही सायकल रॅली उत्साहपूर्ण वातावरणात यशस्वीरीत्या पार पडली.
