झेडपी शाळा – आरोग्य केंद्रांच्या अनेक इमारती धोकादायक…!

अक्कलकोट तालुक्यातील बबलाद झेडपी शाळेत स्लॅपचा प्लॅस्टर अंगावर पडल्यामुळे 13 मुले आणि दोन शिक्षक जखमी झाले. यामुळे आता जिल्हा प्रशासन खडबडून जागे झाले आहे. ज्या एजन्सीने स्ट्रक्चरल ऑडिट केले त्यामध्ये ही शाळा धोकादायक नव्हतीच त्यामुळे स्ट्रक्चरल ऑडिट वर देखील संशय निर्माण झाला आहे. सोलापूर जिल्हा परिषदेच्या 2754 शाळा असून त्यामध्ये 11,605 वर्गखोल्या आहेत. नवीन वर्गखोल्या बांधणे, शाळांची दुरुस्ती करणे यासाठी कोट्यावधी रुपये खर्च केले जातात. मात्र राजकारणी लोक ठेकेदार बनल्यामुळे निकृष्ट दर्जाची कामे होतात आणि त्याला अधिकाऱ्यांचा वरदहस्त असतो. अशीच अवस्था जिल्ह्यातील आरोग्य केंद्रांची आहे. जिल्ह्यात 62 प्राथमिक आरोग्य केंद्र आणि 432 उपकेंद्र आहेत. शाळा असोत की आरोग्य केंद्र असो इथे ठेकेदारी घुसल्यामुळे नवीन बांधकामे देखील गळू लागली आहेत. याकडे अधिकारी आणि पदाधिकारी दुर्लक्ष करतात. 432 आरोग्य उपकेंद्रांपैकी सुमारे 100 आरोग्य उपकेंद्रे अत्यंत धोकादायक पद्धतीचे आहेत. त्यामुळे आता शाळांच्या वर्ग खुल्या आणि आरोग्य केंद्रांच्या इमारतीचे स्ट्रक्चरल ऑडिट करून त्यावर तातडीने उपाययोजना करणे गरजेचे आहे. अन्यथा दुर्घटना घडण्यास वेळ लागणार नाही. आज सोलापूर झेडपीची दुपारी सर्वसाधारण सभा होणार आहे त्यामुळे या विषयावर चर्चा होईल हे नक्की.