सोलापूर – महिलांच्या आरोग्याविषयी जनजागृती व प्रतिबंधात्मक आरोग्यसेवा उपलब्ध करून देण्याच्या उद्देशाने भावसार व्हिजन इंडिया, सोलापूर सेंट्रल यांच्या वतीने महिलांसाठी मोफत ‘पिंक ओपीडी’ आरोग्य तपासणी शिबिर महिला रुग्णालय, गुरुनानक चौक, सोलापूर येथे उत्स्फूर्त प्रतिसादात संपन्न झाले. या शिबिराला महिलांचा मोठ्या प्रमाणात प्रतिसाद लाभला. शिबिरामध्ये महिलांनी स्त्रीरोग तपासणी, कर्करोग जनजागृती व तपासणी, रक्तदाब, मधुमेह, बीएमआय तपासणी तसेच इतर विविध आरोग्य सेवांचा लाभ घेतला. उपस्थित तज्ज्ञ डॉक्टरांनी महिलांना आरोग्याविषयी महत्त्वपूर्ण मार्गदर्शन केले.
या उपक्रमासाठी निर्वाचित अध्यक्ष प्रभाकर जवळकर, वुमन वेल्फेअर डायरेक्टर आरती खमीतकर, सचिव इंजि. सागर पुकाळे, संचालक प्रकाश भांबुरे, किरण रणसुभे आणि सौ. दीपा उपरे यांची विशेष उपस्थिती होती. उपस्थित मान्यवरांनी महिलांना नियमित आरोग्य तपासणीचे महत्त्व सांगून अशा उपक्रमांचा लाभ घेण्याचे आवाहन केले.
महिलांच्या आरोग्य संवर्धनासाठी आयोजित करण्यात आलेल्या या शिबिरास मिळालेल्या उत्स्फूर्त प्रतिसादाबद्दल भावसार व्हिजन इंडिया, सोलापूर सेंट्रल यांच्या वतीने सर्व सहभागी महिला, वैद्यकीय अधिकारी, आरोग्य कर्मचारी तसेच सहकार्य करणाऱ्या सर्वांचे मनःपूर्वक आभार मानण्यात आले.
