सोलापूर महानगरपालिकेच्या पल्स पोलिओ अभियानाचा शुभारंभ; प्रत्येक बालकाला पोलिओ प्रतिबंधक लस देण्याचे महापौरांचे आवाहन…
सोलापूर- सोलापूर महानगरपालिकेच्या आरोग्य विभागाच्या वतीने राष्ट्रीय पल्स पोलिओ लसीकरण अभियानांतर्गत आज दाराशा हॉस्पिटल येथे पल्स पोलिओ लसीकरण मोहिमेचा शुभारंभ महापौर विनायक कोंडयाल यांच्या हस्ते बालकाला पोलिओ प्रतिबंधक लसीचे दोन थेंब पाजून करण्यात आला.
यावेळी उपमहापौर ज्ञानेश्वरी देवकर, स्थायी समिती सभापती रंजीता चाकोते, अतिरिक्त आयुक्त विना पवार, आरोग्य अधिकारी डॉ. राखी माने, शहर लेखा व्यवस्थापक सिद्धेश्वर बोरगे यांच्यासह महानगरपालिकेचे अधिकारी, कर्मचारी, आरोग्य विभागाचे अधिकारी तसेच मान्यवर उपस्थित होते.
यावेळी महापौर विनायक कोंडयाल यांनी नागरिकांना आवाहन करताना सांगितले की, “पोलिओमुक्त भारताचे स्वप्न कायम राखण्यासाठी प्रत्येक पालकाने आपल्या पाच वर्षांखालील बालकाला पल्स पोलिओ लसीचे दोन थेंब अवश्य पाजावेत. कोणतेही मूल लसीकरणापासून वंचित राहू नये, ही प्रत्येकाची सामूहिक जबाबदारी आहे. सोलापूर महानगरपालिकेने शहरभर विविध लसीकरण केंद्रे आणि फिरती पथके कार्यरत केली असून नागरिकांनी या अभियानाला उत्स्फूर्त प्रतिसाद देऊन आपल्या मुलांचे लसीकरण करून घ्यावे.”
आरोग्य विभागामार्फत शहरातील सर्व लसीकरण केंद्रांवर तसेच गरजेनुसार फिरत्या पथकांच्या माध्यमातून पाच वर्षांखालील सर्व बालकांना पोलिओ प्रतिबंधक लसीचे दोन थेंब पाजण्याची व्यवस्था करण्यात आली आहे. अभियान यशस्वी करण्यासाठी आरोग्य कर्मचारी, आशा स्वयंसेविका व संबंधित यंत्रणा कार्यरत असून कोणतेही बालक लसीकरणापासून वंचित राहणार नाही यासाठी विशेष नियोजन करण्यात आले आहे.
सोलापूर महानगरपालिकेने सर्व पालकांना आपल्या पाच वर्षांखालील बालकांना पल्स पोलिओ लसीचे दोन थेंब पाजून या राष्ट्रीय आरोग्य अभियानात सक्रिय सहभाग नोंदविण्याचे आवाहन केले आहे.
