सोलापूर- अंमली पदार्थांचे सेवन आणि अवैध तस्करी विरोधी आंतरराष्ट्रीय दिन तसेच भारत सरकारच्या सामाजिक न्याय व अधिकारिता मंत्रालयाच्या वतीने १७ ते २६ जून दरम्यान राबविण्यात येणाऱ्या ‘नशा मुक्त भारत अभियान’ अंतर्गत मेरा युवा भारत, सोलापूर व नशा मुक्ती उपचार केंद्र, सोलापूर यांच्या संयुक्त विद्यमाने नशामुक्ती जनजागृती कार्यक्रमाचे आयोजन करण्यात आले.
कार्यक्रमाच्या प्रारंभी छत्रपती राजर्षी शाहू महाराज यांच्या जयंतीनिमित्त त्यांच्या प्रतिमेस पुष्पहार अर्पण करून अभिवादन करण्यात आले. त्यानंतर जनजागृती कार्यक्रमास सुरुवात झाली.
या कार्यक्रमास प्रमुख अतिथी म्हणून सोलापूरच्या संवेदनशील उपमहापौर ज्ञानेश्वरी महेश देवकर उपस्थित होत्या. तसेच विजापूर पोलीस ठाण्याचे पोलीस अधिकारी उदयसिंह साळुंखे, जिल्हा विधी सेवा प्राधिकरणाचे राहुल बिराजदार, व्यसनमुक्ती केंद्राचे प्रकल्प संचालक अनिल लिंगे, नशा मुक्त भारत अभियानाचे ब्रँड ॲम्बेसेडर रमेश खाडे यांच्यासह पोलीस प्रशासन, विविध शासकीय विभागांचे अधिकारी, कर्मचारी आणि व्यसनमुक्ती केंद्रातील बांधव मोठ्या संख्येने उपस्थित होते. जिल्हा विधी सेवा प्राधिकरण यांच्या माध्यमातून नशा मुक्ती भारत या साठी शपथ ही घेण्यात आली
यावेळी उपमहापौर ज्ञानेश्वरी महेश देवकर यांनी व्यसनमुक्ती केंद्राची पाहणी करून तेथील बांधवांशी मनमोकळा संवाद साधला. “नशापासून दूर राहा, आपल्या कुटुंबाचा विचार करा आणि व्यसनाच्या विळख्यातून बाहेर पडून नव्या आशेने, आत्मविश्वासाने व स्वाभिमानाने सुंदर आयुष्य जगा,” असे भावनिक आवाहन त्यांनी केले. तसेच व्यसनमुक्त जीवनाचा संकल्प करून समाजातही नशामुक्तीचा संदेश पोहोचविण्याचे आवाहन त्यांनी उपस्थितांना केले.
कार्यक्रमात विविध मान्यवरांनी अंमली पदार्थांच्या दुष्परिणामांवर मार्गदर्शन केले. युवकांनी व्यसनापासून दूर राहून निरोगी, जबाबदार आणि सशक्त भारत घडविण्यासाठी पुढाकार घ्यावा, असा संदेश देण्यात आला. जनजागृतीपर हा कार्यक्रम उत्स्फूर्त प्रतिसादात आणि प्रबोधनात्मक वातावरणात संपन्न झाला.
