दक्षिण आफ्रिकेतील डर्बन येथे आयोजित करण्यात आलेल्या जगातील सर्वात कठीण समजल्या जाणाऱ्या कॉम्रेड्स अल्ट्रा मॅरेथॉन स्पर्धेत सहभागी होत सोलापूर शहर पोलिस आयुक्तालयातील सहाय्यक पोलिस निरीक्षक दत्तात्रय काळे आणि पोलिस अंमलदार हेमंत वायमये यांनी उल्लेखनीय कामगिरी करत सोलापूर पोलिस दलाचे नाव आंतरराष्ट्रीय स्तरावर उज्ज्वल केले आहे.
राष्ट्रीय गीतानंतर पहाटे ५ वाजता सुरू झालेल्या या स्पर्धेत यंदा 85.777 किलोमीटर अंतराची चढाईची शर्यत पार करावी लागली. जगातील सर्वात कठीण धावस्पर्धांपैकी एक मानल्या जाणाऱ्या या स्पर्धेत तब्बल 21,678 धावपटूंनी सहभाग घेतला होता.
या स्पर्धेत सहाय्यक पोलिस निरीक्षक दत्तात्रय काळे यांनी 10 तास 23 मिनिटांत, तर पोलिस अंमलदार हेमंत वायमये यांनी 9 तास 29 मिनिटांत शर्यत पूर्ण केली. हेमंत वायमये यांनी महाराष्ट्र पोलिस दलातून प्रथम येण्याचा मान मिळवत उल्लेखनीय यश संपादन केले.
कॉम्रेड्स अल्ट्रा मॅरेथॉन ही केवळ धावण्याची स्पर्धा नसून ती एक अल्टिमेट ह्युमन रेस म्हणून जगभर प्रसिद्ध आहे. वेळेच्या कठोर निकषांमुळे आणि आव्हानात्मक मार्गामुळे स्पर्धकांच्या शारीरिक व मानसिक क्षमतेची खरी कसोटी या स्पर्धेत लागते.
प्रखर थंडी, उष्णता, जीवघेणी चढण आणि मानसिक-शारीरिक आव्हानांचा सामना करत दोन्ही धावपटूंनी ही स्पर्धा यशस्वीरित्या पूर्ण केली. अंतिम टप्प्यात हजारो प्रेक्षकांच्या उत्साहवर्धक प्रतिसादात त्यांनी भारताचा तिरंगा फडकावत देशाचा अभिमान उंचावला.
या उल्लेखनीय यशाबद्दल सोलापूर शहर पोलिस आयुक्त एम. राजकुमार यांनी दत्तात्रय काळे व हेमंत वायमारे यांचे अभिनंदन केले आहे.
