सोलापूर – दक्षिण सोलापूर तालुका कृषि अधिकारी कार्यालयाच्या अधिनस्त कार्यरत असलेले अमोल नामदेव देवकर, सहाय्यक कृषि अधिकारी, कासेगाव यांच्याविरुद्ध शेतकऱ्यास अर्वाच्च भाषेत शिवीगाळ केल्याप्रकरणी तक्रार दाखल करण्यात आली होती.
मिळालेल्या माहितीनुसार, कासेगाव येथील शेतकरी अजित जाधव यांना दूरध्वनीवरून अर्वाच्च भाषेत शिवीगाळ केल्याचा आरोप देवकर यांच्यावर करण्यात आला होता. या घटनेबाबत कासेगाव ग्रामपंचायत सरपंच, उपसरपंच तसेच मौजे गावातील शेतकऱ्यांच्या स्वाक्षरीसह दिनांक 29 मे 2026 रोजी कृषि विभागाकडे लेखी तक्रार सादर करण्यात आली होती.
सदर तक्रारीची कृषि विभागाने तात्काळ दखल घेतली असून, मा. विभागीय कृषि सहसंचालक, पुणे विभाग, पुणे यांच्या कार्यालयामार्फत प्राथमिक तपासणीअंती अमोल नामदेव देवकर, सहाय्यक कृषि अधिकारी, कासेगाव यांना दिनांक 29 मे 2026 रोजी तात्काळ निलंबित करण्यात आले आहे.याप्रकरणी पुढील प्रशासकीय कार्यवाही नियमानुसार करण्यात येणार असल्याची माहिती जिल्हा अधीक्षक कृषी अधिकारी शुक्राचार्य भोसले यांनी प्रसिध्दीपत्रकाद्वारे दिली आहे.
