मुंबई : देशात सातत्याने वाढत असलेल्या डिझेल दरांचा मोठा फटका आता राज्य परिवहन महामंडळाला बसू लागला आहे. वाढत्या इंधन दरांमुळे एसटी महामंडळाच्या खर्चात तब्बल ३१० कोटी रुपयांची वाढ झाली असून, भविष्यात एसटी प्रवास महागण्याची शक्यता निर्माण झाली आहे.
यापूर्वी एसटी महामंडळाचा डिझेलवरील खर्च सुमारे ३३०० कोटी रुपये होता. मात्र अलीकडील दरवाढीनंतर या खर्चात मोठी भर पडली आहे. १५ मे रोजी झालेल्या पहिल्या दरवाढीत डिझेल ३.१० रुपयांनी महागले, त्यामुळे सुमारे १२४ कोटी रुपयांचा अतिरिक्त भार पडला. त्यानंतरच्या तीन टप्प्यातील दरवाढींमुळे अनुक्रमे ३७.२० कोटी, ३६.४० कोटी आणि ११२.४० कोटी रुपयांचा खर्च वाढला आहे.
या पार्श्वभूमीवर राज्याचे परिवहन मंत्री प्रताप सरनाईक यांनी पत्रकार परिषद घेत परिस्थितीची माहिती दिली. डिझेल बचतीसाठी प्रत्येक आगाराला विशेष सूचना देण्यात आल्या असून, ज्या आगारात सर्वाधिक बचत होईल त्यांना बक्षीस देण्याची घोषणा त्यांनी केली.
सरनाईक म्हणाले की, “प्रत्येक आगारातून दररोज किमान पाच लिटर डिझेल बचत करण्याचे उद्दिष्ट देण्यात आले आहे. वाढत्या इंधन दरांमुळे एसटी महामंडळावर मोठा आर्थिक ताण निर्माण झाला आहे.”
सध्या डिझेलचा दर ९१ रुपयांच्या पुढे गेला असून, केवळ एप्रिल २०२६ या एका महिन्यातच एसटी महामंडळाला सुमारे ७६ कोटी रुपयांचा तोटा सहन करावा लागला आहे. अशाच प्रकारे महागाई आणि इंधन दर वाढत राहिल्यास एसटी टिकवण्यासाठी भविष्यात प्रवासी भाडेवाढ अपरिहार्य ठरू शकते, असे संकेतही परिवहन मंत्र्यांनी दिले.
