सोलापूर विद्यापीठात जयंती सप्ताह, चित्र व ग्रंथ प्रदर्शनाचे उद्घाटन
सोलापूर – पुण्यश्लोक अहिल्यादेवी होळकर यांनी प्रतिकूल परिस्थितीत आदर्श व सर्वसमावेशक राज्यकारभार घडवून राष्ट्रनिर्मितीत मोलाचे योगदान दिले. त्यांच्या कार्याचा वारसा आणि विचार तळागाळापर्यंत पोहोचवणे ही आपली जबाबदारी आहे, असे प्रतिपादन अक्कलकोट विधानसभेचे आमदार सचिन कल्याणशेट्टी यांनी केले.
पुण्यश्लोक अहिल्यादेवी होळकर सोलापूर विद्यापीठातर्फे आयोजित त्रिशताब्दी जयंती महोत्सवाच्या सांगता सप्ताहाचे तसेच चित्र व ग्रंथ प्रदर्शनाचे उद्घाटन आमदार कल्याणशेट्टी यांच्या हस्ते झाले. यावेळी ते बोलत होते. अध्यक्षस्थानी कुलगुरू प्रा. डॉ. प्रकाश महानवर होते. यावेळी माजी कुलगुरू डॉ. इरेश स्वामी, प्र-कुलगुरू प्रा. डॉ. लक्ष्मीकांत दामा, प्रभारी कुलसचिव डॉ. अतुल लकडे, विद्यार्थी विकास विभागाचे संचालक डॉ. केदारनाथ काळवणे, ज्ञानस्रोत केंद्राचे संचालक डॉ. अनिल घनवट आदींची प्रमुख उपस्थिती होती. प्रारंभी पुण्यश्लोक अहिल्यादेवी होळकर अध्यासन केंद्राचे संचालक डॉ. प्रभाकर कोळेकर यांनी दि. २५ ते ३१ मे २०२६ या आठवड्यात विद्यापीठातर्फे विविध उपक्रमांचे आयोजन करण्यात आल्याची माहिती दिली.
आमदार कल्याणशेट्टी म्हणाले, पुण्यश्लोक अहिल्यादेवी होळकर यांनी देशभरातील अनेक मंदिरांचा जिर्णोद्धार करण्याबरोबरच विहिरी, घाट, बारवांची निर्मिती केली. अहिल्यादेवी होळकर यांचे कर्तुत्व मोठे होते. विद्यापीठाने आज त्यांचा वारसा जपत चांगली प्रगती करत आहे. लोकप्रतिनिधी म्हणून विद्यापीठाच्या प्रगतीसाठी आम्ही सातत्याने प्रयत्न करणार आहोत, असे त्यांनी सांगितले. डॉ. इरेश स्वामी म्हणाले, 2004 मध्ये स्थापन झालेल्या विद्यापीठाने अल्पावधीत उत्तुंग प्रगती केली आहे. प्रथम कुलगुरू म्हणून हा विकास पाहताना अभिमान वाटतो. तसेच त्यांनी अहिल्यादेवी होळकर व महात्मा बसवेश्वर यांच्या कार्याचा गौरव करत त्यांच्या विचारांचे अनुकरण करण्याचे आवाहन केले.
कुलगुरू डॉ. महानवर यांनी सांगितले की, अहिल्यादेवींच्या कार्याचा व्यापक सामाजिक प्रभाव जनतेपर्यंत पोहोचवण्यासाठी सप्ताहभर विविध कार्यक्रम आखण्यात आले आहेत. विद्यापीठात वृक्षारोपणाचा मोठा उपक्रम सुरू असून समाजातील विविध घटक त्यास सक्रिय सहाय्य करीत आहेत. कौशल्य विकासाबरोबरच विविध भाषांचे प्रशिक्षण अभ्यासक्रम शहरात सुरू करण्याची विद्यापीठाची योजना असल्याचेही त्यांनी स्पष्ट केले. जयंतीनिमित्त विद्यापीठाच्या ज्ञानस्रोत केंद्रामध्ये ग्रंथ प्रदर्शन सर्वांसाठी खुले करण्यात आले असून अहिल्यादेवींची दुर्मिळ चित्रेही येथे पाहण्यासाठी ठेवण्यात आली आहेत. विद्यार्थी व नागरिकांनी या प्रदर्शनाचा लाभ घ्यावा, असे आवाहन करण्यात आले.
छत्रपती शिवाजी स्मारक मंडळाने विद्यापीठास ५ हजार पुस्तकांची देणगी दिली. त्याबद्दल स्मारक मंडळाचे अध्यक्ष रंगनाथ बंकापूर, गंगाधर गवसने, वरदराज बंग, प्रसाद जिरांकलगीकर, माधवी कुलकर्णी, पुरुषोत्तम कारकल आदींचा सत्कार करण्यात आला. माजी कुलगुरू डॉ. इरेश स्वामी यांनीही पुस्तके भेट दिली. यावेळी व्यवस्थापन परिषदेचे सदस्य प्रा. देवानंद चिलवंत, प्रा. सचिन गायकवाड आदी मान्यवर उपस्थित होते. कार्यक्रमाचे सूत्रसंचालन डॉ. तेजस्विनी कांबळे व प्रा. श्रुती देवळे यांनी केले. आभार डॉ. अनिल घनवट यांनी मानले.
फोटो ओळ:
सोलापूर: पुण्यश्लोक अहिल्यादेवी होळकर सोलापूर विद्यापीठात पुण्यश्लोक अहिल्यादेवी होळकर त्रिशताब्दी जयंती सप्ताह तसेच चित्र व ग्रंथ प्रदर्शनाचे उद्घाटन आमदार सचिन कल्याणशेट्टी यांच्या हस्ते झाले. यावेळी कुलगुरू प्रा. डॉ. प्रकाश महानवर, माजी कुलगुरू डॉ. इरेश स्वामी, प्र-कुलगुरू प्रा. डॉ. लक्ष्मीकांत दामा, प्रभारी कुलसचिव डॉ. अतुल लकडे, डॉ. प्रभाकर कोळेकर, डॉ. केदारनाथ काळवणे, डॉ. अनिल घनवट व अन्य.
