सोलापूर महापालिकेची मे महिन्यातील सर्वसाधारण सभा 20 मे रोजी सकाळी साडेअकरा वाजता आयोजित केली आहे. या सभेचा पुरवणी अजेंडा आज प्रसिद्ध करण्यात आला. स्वीकृत एका नगरसेवकाची आणि परिवहन समितीच्या सदस्यांची निवड करण्याचा प्रस्ताव अद्यापही या सभेत आला नाही. पुरवणी विषय पत्रिकेत एकूण 21 प्रस्ताव आहेत त्यापैकी तब्बल 11 प्रस्ताव हे विविध रस्त्यांना आणि चौकांना नावे दाखल करण्याचेच सभासद प्रस्ताव आहेत. आगामी पंधरा दिवसात पावसाळा सुरू होणार आहे त्यामुळे नाले साफसफाई..रस्ते करणे, खड्डे बुजवणे.. पाणीपुरवठा या संदर्भाची प्रस्ताव सभागृहात येथील अशी अपेक्षा असताना नगरसेवकांनी मात्र सभासद प्रस्ताव दाखल करून चौकाला याचे नाव द्या– त्याचे नाव द्या…असे प्रस्ताव दाखल केले आहेत.
विशेष म्हणजे जुळे सोलापुरातील नाट्यगृहाची जागा आता कुठे नेहरूनगर या ठिकाणी करण्याचे निश्चित झाले आहे. अद्याप नाट्यगृह बांधण्याचे टेंडर निघाले नाही. नाट्यगृहाचे बांधकाम कधी पूर्ण होणार हे माहीत नाही तोपर्यंतच या सभागृहाला भारतरत्न स्वर्गीय अटल बिहारी वाजपेयी नाट्यगृह असे नाव देण्याचा प्रस्ताव उपमहापौर ज्ञानेश्वरी देवकर, नगरसेवक राजशेखर पाटील आणि सत्यजित वाघमोडे यांनी दाखल केला आहे. जयकुमार माने, संगीता जाधव, श्रीदेवी फुलारे,विनोद भोसले , वृषाली चालुक्य, राजू पाटील कल्पना कारभारी, सारिका खजूरगी, बसवराज केंगनाळकर आदि नगरसेवकांनी चढाओढीने विविध चौक तसेच रस्त्यांना नावे देण्याचे सभासद प्रस्ताव दाखल केले आहेत.तब्बल दोन कोटी रुपये खर्चून बांधलेल्या आकांक्षी टॉयलेट पैकी एसटी स्टँड समोरील क्रोमा जवळील एसी टॉयलेट वगळता विणकर बाग, नाना नानी पार्क, आणि जुळे सोलापूर पाणी टाकी, हे तीन एसी टॉयलेट प्रत्येकी तीन वर्षाकरिता भाड्याने देण्याचे प्रस्ताव या सभेत मंजुरीसाठी आले आहे.
