सोलापूर झेडपीचे 21 वे अध्यक्ष म्हणून बार्शी तालुक्यातील उपळाई ठोंगे झेडपी गटातून तब्बल 11000 मताधिक्यांनी निवडून आलेले दीपक वैद्य यांची बिनविरोध निवड झाली. अत्यंत गरीब आणि सर्वसामान्य शेतकरी वर्गातील वैद्य असून त्यांची कोणतीही राजकीय पार्श्वभूमी नसताना भाजपने त्यांना थेट अध्यक्ष केले. त्यांचे शिक्षण दहावी झाले आहे. वैद्य यांच्या रूपाने बार्शी तालुक्याला प्रथमच झेडपी अध्यक्ष पदाचा मान मिळाला आहे. ते धनगर समाजाचे आहेत. दुसरीकडे भाजपचे माजी जिल्हाध्यक्ष शहाजी पवार यांचे बंधू आणि उत्तर सोलापूर तालुक्यातील बीबी दारफळ गटातून झेडपीचे माजी अध्यक्ष बळीराम काका साठे यांना पराभूत करून निवडून आलेले इंद्रजीत पवार यांना उपाध्यक्ष पदाचा बहुमान मिळाला आहे. गेल्या 35 वर्षापासून भाजपबरोबर राहिलेल्या आणि आता आमदार सुभाष देशमुख यांच्यापासून दुरावलेल्या इंद्रजीत पवार यांना पालकमंत्री जयकुमार गोरे यांनी निष्ठेचे फळ म्हणून उपाध्यक्ष पद दिले आहे. अध्यक्ष आणि उपाध्यक्ष पदासाठी प्रत्येकी एकच अर्ज आल्यामुळे पिठासन अधिकारी तथा जिल्हाधिकारी कुमार आशीर्वाद यांनी या दोन्ही निवडी बिनविरोध जाहीर केल्या. निवडीनंतर पालकमंत्री जयकुमार गोरे, आमदार सचिन कल्याणशेट्टी, आमदार राजा राऊत, माजी आमदार राजन पाटील,माजी आमदार दीपक साळुंखे,माजी आमदार प्रशांत परिचारक, माजी आमदार राम सातपुते, भाजपचे जिल्हाध्यक्ष शशिकांत चव्हाण, आमदार सुभाष देशमुख यांचे चिरंजीव मनीष देशमुख यांनी उपस्थित राहून नूतन पदाधिकाऱ्यांना शुभेच्छा दिल्या. यावेळी सभागृहात निवडून आलेले झेडपीचे 68 सदस्य तसेच 11 पंचायत समितीचे सभापतीजे झेडपीचे पदसिद्ध सदस्य असतात ते उपस्थित होते. जिल्हाधिकारी कुमार आशीर्वाद झेडपीचे, सीईओ कुलदीप जंगम, उपजिल्हाधिकारी संतोष देशमुख, झेडीपीच्या अतिरिक्त मुख्य कार्यकारी अधिकारी संदीप कोहिनकर, आदींनी अध्यक्ष तसेच उपाध्यक्षांचे स्वागत केले.
सर्वसामान्य शेतकऱ्याचा मुलगा झाला झेडपी अध्यक्ष तर इंदाभाऊला निष्ठेचे फळ
