सोलापूर : सोलापूर महानगरपालिका सार्वत्रिक निवडणूक २०२५ च्या पार्श्वभूमीवर शहरात अवैध दारू निर्मिती, विक्री व वाहतूक करणाऱ्यांविरोधात गुन्हे शाखेने विशेष मोहीम राबवत धडक कारवाई केली आहे. पोलीस आयुक्त सोलापूर शहर यांनी दिलेल्या निर्देशानुसार गुन्हे शाखेतील अधिकारी व अंमलदारांनी गोपनीय माहितीच्या आधारे ही कारवाई केली.
दि. ०९/०९/२०२५ रोजी गुन्हे शाखेचे सपोनि शैलेश खेडकर व त्यांच्या पथकाने सलगरवस्ती पोलीस स्टेशन हद्दीतील मोळी कवडे येथे छापा टाकून सुमारे १२५ लिटर गुळमिश्रित रसायन व ८ लिटर रसायनयुक्त हातभट्टी दारू जप्त केली. यामध्ये सुमारे ५२,७५० रुपयांचा मुद्देमाल नष्ट करण्यात आला. याप्रकरणी कुमार उर्फ बाबु पांडुरंग चव्हाण (रा. मोळे तांडा, ता. उत्तर सोलापूर) याच्यावर महाराष्ट्र दारूबंदी अधिनियमान्वये गुन्हा दाखल करण्यात आला.
तसेच दि. १२/०९/२०२५ रोजी हॉटेल अँबॅसिडर ते प्रभाकर महाराज मंदिर रोडवर अवैधरीत्या देशी-विदेशी दारू विक्रीसाठी वाहतूक करणाऱ्या अमोल बाळासाहेब गोरसे याच्याकडून सुमारे १,०३,६६० रुपयांची दारू व दुचाकी जप्त करण्यात आली. याप्रकरणी फौजदार चावडी पोलीस स्टेशन येथे गुन्हा दाखल करण्यात आला आहे.
याच दिवशी गांधी नगर, अक्कलकोट रोड परिसरात नंदू रामल कोडा याच्याकडून सुमारे १,३३,५०० रुपयांची देशी-विदेशी दारू व ऑटो रिक्षा जप्त करण्यात आली. तर कर्णिक नगर परिसरात संदीप विष्णु शिंदे याच्याकडून १,३५,४८० रुपयांची दारू व चारचाकी वाहन जप्त करून जेरबंद करण्यात आले आहे.
ही संपूर्ण कारवाई पोलीस आयुक्त एम. राजकुमार, पोलीस उपआयुक्त (गुन्हे) डॉ. अश्विनी पाटील, सहा. पोलीस आयुक्त राजन माने व वरिष्ठ अधिकाऱ्यांच्या मार्गदर्शनाखाली करण्यात आली. निवडणूक कालावधीत अवैध व्यवसाय करणाऱ्यांवर कठोर कारवाई सुरूच राहणार असल्याचा इशारा पोलिस प्रशासनाने दिला आहे.
