व्यवसायिक महाविद्यालयांना मागे टाकत शाळेच्या विद्यार्थ्यांनी मिळवला रोजगार
सोलापूर – बहुसंख्य कामगार वस्ती असलेल्या हैदराबाद रोड, जुनी विडी घरकुल येथील राष्ट्रमाता इंदिरा प्रशाला येथील विद्यार्थ्यांसाठी प्रशालेने रोजगार मेळावा आयोजित केला होता. यामध्ये अनेक बहुराष्ट्रीय कंपन्यांमध्ये विद्यार्थ्यांना नोकरी मिळवण्यात यश मिळाले आहे. अशी माहिती विद्यालयाचे संचालक अमृतदत्त चिन्नी यांनी दिली आहे.
नोकरी, रोजगार मिळवणे दिवसेंदिवस कठीण होत आहे,अशावेळी राष्ट्रमाता इंदिरा प्रशालेच्या वतीने बहुराष्ट्रीय कंपन्यांमध्ये आपल्या विद्यार्थ्यांना रोजगार मिळवून देण्यासाठी मेळाव्याचे आयोजन केले होते. विद्यार्थ्यांना योग्य मार्गदर्शन,आवश्यक कौशल्य दिल्यामुळे नोकरी मिळवण्यास ते पात्र ठरले. जवळपास 60 विद्यार्थ्यांना आंतरराष्ट्रीय कंपन्यांमध्ये नोकरी मिळाल्याचे समाधान, प्राथमिक शाळेचे मुख्याध्यापक तोळणूरे यांनी व्यक्त केले.
यातील अनेक विद्यार्थ्यांना विविध कंपन्यांच्या मार्फत मॅकेट्रॉनिकस डिप्लोमा ही पदवी मिळणार आहे. त्याचप्रमाणे दर महा त्यांना वेतन देखील देण्यात येणार आहे. असे दुहेरी लाभ येथील विद्यार्थ्यांना झाल्याची माहिती संस्थेकडून देण्यात आली आहे.
सदर मेळाव्यास उपस्थिती विद्यार्थ्यांना सामाजिक कार्यकर्ते प्रा.विलास बेत,रवींद्र मोकाशी,उत्तम नवघरे,क्वेस कार्पोरेशनचे अधिकारी प्रकाश पवार, शिक्षण संस्थेचे संचालक अमृतदत्त चिन्नी, समाजसेवा महाविद्यालयाचे प्राचार्य गायकवाड .एल. आर., प्रशालेचे मुख्याध्यापक गाढवे के .एस, प्राथमिक शाळेचे मुख्याध्यापक.तोळणूरे .एम .के आदींनी मार्गदर्शन केले. याप्रसंगी प्रशालेचे शिक्षक चिकने .एम .टी, गुंड .सी .ए, जाधव ए.वि, सेवकवर्ग आदीनी परिश्रम घेतले.
