पोलिसानेच मनसे उमेदवाराला शिंदेंच्या बंगल्यावर नेले:अर्ज मागे घेण्यासाठी दमदाटी केल्याचा अविनाश जाधवांचा आरोप

महापालिकेची निवडणूक अवघ्या काही दिवसांवर आली असून सर्वच राजकीय पक्षांनी आता उमेदवारांच्या प्रचाराला सुरुवात केली आहे. त्यात आता ठाकरे बंधूंनी संयुक्त पत्रकार परिषद घेत आज मुंबईसाठी वचननामा देखील प्रकाशित केला. तर दुसरीकडे बिनविरोध निवडणूक झालेल्या ठिकाणी महायुतीने दमदाटी तसेच आर्थिक आमिष दाखवत विरोधी उमेदवारांना अर्ज मागे घ्यायला लावल्याचे आरोप केले जात आहेत. मनसे नेते अविनाश जाधव यांनी याबाबत थेट उपमुख्यमंत्री एकनाथ शिंदे यांच्यावर निशाणा साधला आहे.

अविनाश जाधव यांनी ठाणे महापालिका निवडणुकीत महाविकास आघाडीच्या उमेदवारांना अर्ज मागे घेण्यासाठी दम देण्यात आल्याचा आफरोप केला आहे. अविनाश जाधव यांनी उपमुख्यमंत्री एकनाथ शिंदे यांच्या ठाण्याच्या निवासस्थानी मनसेच्या उमेदवाराला एक पोलिस अधिकारी घेऊन जात असल्याचा व्हिडिओ दाखवला आहे. तसेच शिंदे यांच्या घरी गेल्यानंतर हा उमेदवार अर्ज मागे घेतो, असेही जाधव यांनी म्हटले आहे. विक्रांत घाग असे या उमेदवाराचे नाव असून आता या उमेदवाराचा मोबाइल देखील बंद असल्याची माहिती जाधव यांनी दिली.

उमेदवाराचा फोन स्विच ऑफ

अविनाश जाधव म्हणाले, उमेदवारी अर्ज पाठीमागे घेण्याचा दिवसाचा तो व्हिडिओ आहे. आम्हाला हा व्हिडिओ तिथे उपस्थित असलेल्या पत्रकारांच्या माध्यमातून आलेले आहे, आम्ही तिथे थोडी कॅमेरे लावले होते. अद्याप तो उमेदवार आम्हाला भेटलाच नाहीये, तो फोन स्विच ऑफ करून गायब आहे. जर त्याला एक पोलिसवाला घेऊन जात असेल तर त्याला धमकवलाच असेल ना? त्याला आतमध्ये घेऊन जाणारा माणूस हा पोलिस ऑफिसर आहे. तो कुठल्या जदतगे स्टेशनला आहे कुठल्या क्राईम ब्रँचला आहे तो तुम्ही शोधा. ज्यांनी ज्यांनी शिवसेना मनसे पक्षाची गद्दारी केली आहे त्यांचा पाहुणचार होणार असल्याचा इशारा जाधव यांनी दिला आहे.

बिनविरोध निवडून यायचा नवीन फंडा सुरू- राजन विचारे

तसेच शिवसेना ठाकरे गटाचे नेते राजन विचारे यांनी देखील या प्रकरणावर भाष्य केले आहे. ते म्हणाले, महाराष्ट्रामध्ये 68 बिनविरोध निवडून आलेले आहेत. यात भाजपच्या 44, शिंदे गटाच्या 22 नगरसेवकांचा समावेश आहे. बिनविरोध निवडून यायचा हा नवीन फंडा सुरू झालेला आहे. मशीनमध्ये गडबड, वोट चोरीनंतर आता इलेक्शनच्या अगोदरच त्या ठिकाणी पैसे देऊन, धमक्या देऊन, पोलिसांना वापरुन निवडणूक जिंकली जात आहे.

पुढे बोलताना राजन विचारे म्हणाले, विरोधकांचे 336 फॉर्म बाद केले आहेत. एकूण 68 बिनविरोध आलेत, त्यातला एकही विरोधी पक्षाचा नाही, उद्धव ठाकरे गटाचा नाही, मनसे पक्षाचा नाही कशा पद्धतीने षडयंत्र केलेला आहे. नोटाचा पर्याय शिल्लक असतानाही बिनविरोध डिक्लेअर केले. इथे पैशाचा वापर केलाय आता उरलेल्या शीट जे आहेत त्यासाठी देखील पैशाचा वापर केला जाणार असल्याचा दावा विचारे यांनी केला आहे.