पालकमंत्री जयकुमार गोरे भाजपच्या 102 ‘भावी’ नगरसेवकांना देणार निवडणूक टिप्स..!

सोलापूर शहरातील तीनही विधानसभा मतदारसंघात ज्या प्रभागात भाजपची ताकद नगण्य आहे, अशा ठिकाणी पालकमंत्री जयकुमार गोरे यांनी ऑपरेशन लोटस यशस्वीपणे राबवले. इलेक्टिव्ह मेरिट पाहून इतर पक्षातील उमेदवारांना खेचून घेत त्यांना उमेदवारी देऊ केली. वास्तविक पाहता 2017 साली झालेल्या महापालिकेच्या निवडणुकीत तब्बल 48 आयात उमेदवारांना भाजपने तिकीट दिले होते. यावेळी बाहेरील पक्षातून आलेल्यांना तिकीट दिलेल्यांची संख्या 25 आहे. पालकमंत्री जयकुमार गोरे यांनी मुख्यमंत्री देवेंद्र फडणवीस यांच्या सूचनेनुसार महापालिकेत स्वबळावर सत्ता यावी यासाठी नियोजन केले आहे. नाराज झालेल्या दोनही आमदार देशमुखांची नाराजी दूर करण्यास यश आले आहे. तसेच मोठ्या प्रमाणावर बंडखोरी झाली असताना देखील ते थंड करण्यात आले आहे. भाजपने अधिकृतपणे 102 उमेदवार निवडणुकीच्या मैदानात उतरवले असून पालकमंत्री जयकुमार गोरे हे आज रात्री नऊ वाजता हॉटेल बालाजी सरोवर मध्ये सर्व उमेदवारांना निवडणुकीच्या टीप्स देणार आहेत. यावेळी आमदार सुभाष देशमुख, आमदार विजयकुमार देशमुख, आमदार देवेंद्र कोठे, आमदार सचिन कल्याणशेट्टी, यासह शहराध्यक्ष रोहिणी तडवळकर उपस्थित राहणार आहेत.