सोलापूर – सोलापूर ग्रामीण पोलीस अधीक्षक अतुल कुलकर्णी यांच्या विशेष पथकाने पुष्पक ऑर्केस्ट्रावर मोठी कारवाई करत एकूण 70 जणांविरोधात गुन्हा दाखल केला आहे. दक्षिण सोलापूर तालुक्यातील कंदलगाव गावाच्या हद्दीत ही कारवाई करण्यात आली.ऑर्केस्ट्रामध्ये महिलांकडून तोकडे कपडे परिधान करून अश्लील हावभाव व नृत्य सादर केले जात असल्याची गोपनीय माहिती पोलिसांना मिळाली होती. त्यानुसार विशेष पथकाने धाड टाकली असता 12 महिला अश्लील नृत्य करत असल्याचे आढळून आले. यावेळी ग्राहकांकडून महिलांवर नोटा उधळल्या जात असल्याचेही निदर्शनास आले.
या कारवाईत एकूण 12 बारबाला, 55 ग्राहक तसेच ऑर्केस्ट्राचा चालक भारत राजाराम नांबे रा. शिवाजीनगर, बाळे, सोलापूर आणि मालक रोहित पांडुरंग चव्हाण रा. सोलापूर यांच्यासह एकूण 70 जणांविरुद्ध गुन्हा दाखल करण्यात आला आहे.महाराष्ट्र हॉटेल, उपहारगृहे व मद्यपानगृहे कायदा तसेच महिलांच्या प्रतिष्ठेचे संरक्षण अधिनियम 2016 आणि भारतीय न्याय संहिता कलम 296 (3)(5) अन्वये गुन्हा नोंदवण्यात आला आहे. कारवाईदरम्यान सुमारे 56 लाख 1 हजार 890 रुपये किमतीचे डीजे साहित्य, ऑर्केस्ट्रा साहित्य, वाहने व मोबाईल फोन जप्त करण्यात आले.
ही कारवाई पोलीस अधीक्षक अतुल कुलकर्णी यांच्या मार्गदर्शनाखाली सहाय्यक पोलीस अधीक्षक राहुल अत्तराम, पोलीस निरीक्षक दशरथ वाघमोडे, सपोनि अनिल सांगळे तसेच मंद्रूप पोलीस ठाण्याच्या पथकाने यशस्वीरीत्या पार पाडली.
