सोलापूर महानगरपालिकेच्या निवडणुकीसाठी शिवसेना उद्धव ठाकरे गट आणि काँग्रेस यांच्यामध्ये तिकीट वाटपावरून मोठी धोबीपछाड झाल्याचे दिसून आले. विशेष म्हणजे या मध्ये उद्धव ठाकरे गटातच्या शिवसेनेची अवस्था टांगा पलटी आणि घोडे फरार अशीच झाली आहे. वर्षानुवर्ष शिवसेनेत असणारे पुरुषोत्तम बर्डे आणि गणेश वानकर यांनी शिवसेनेला सोडचिट्टी दिली आहे. विशेष म्हणजे या दोघांनीही भाजपकडून उमेदवारी मिळवले आहेत. बर्डे यांनी आपली कन्या उत्तरा हिला प्रभाग सात मधून भाजपची उमेदवारी मिळवली आहे. जिल्हाप्रमुख गणेश वानकर, उपजिल्हाप्रमुख दत्ता वानकर, युवा सेना शहर प्रमुख विठ्ठल वानकर, शिवसेनेचे माजी मंत्री उत्तम प्रकाश खंदारे यांच्या कन्या युवती सेनेच्या जिल्हाप्रमुख पूजा खंदारे, तसेच शिवसेनेचे जिल्हाप्रमुख संतोष पाटील यांनी राजीनामे दिले. संतोष पाटील यांच्या पत्नीला भाजपची उमेदवारी देण्यात आली. ज्यांच्यावर सोलापूरच्या शिवसेनेची पक्ष संघटनेची जबाबदारी होती असे संपर्कप्रमुख अनिल कोकीळ यांनी देखील शिवसेनेला जय महाराष्ट्र केला. शिवसेना विद्यार्थी प्रमुख लहू गायकवाड यांनीही पदाचा राजीनामा दिला. ज्यांना शिवसेनेने फॉर्म दिला त्यांनी उमेदवारी नाकारली अशीच अवस्था सोलापूरच्या काँग्रेसमध्ये देखील झाली आहे. आजवर ज्यांना महापौर तसेच स्थायी समितीचे सभापती केले अशांनी काँग्रेसला रामराम ठोकला. त्यामुळे सोलापुरात शिवसेना उद्धव ठाकरे गट आणि काँग्रेसची अवस्था निवडणुकीपूर्वीच केविलवाणी झाली आहे.
सोलापुरात ठाकरेगटाचा टांगा पलटी.. घोडे फरार..! काँग्रेसचीही धोबीपछाड..
