शेवटचा तास शिल्लक..! धाकधूक वाढली..अनेकांची बंडखोरी..

सोलापूर सह राज्यातील 29 महापालिकेच्या निवडणुकीसाठी उमेदवारी अर्ज दाखल करण्यासाठी अवघे काही तास शिल्लक राहिले आहेत. इच्छुकांची प्रचंड गर्दी आणि प्रत्येक पक्षांने एबी फॉर्म देण्यासाठी पाळलेली गुप्तता यामुळे राज्यभर आज बंडखोरीला उधाण येणार आहे. सोलापूर महापालिकेच्या 102 जागांसाठी गेल्या पाच दिवसात 451 जणांचे उमेदवारी अर्ज दाखल झाले आहेत . सोलापुरात शिवसेना उद्धव ठाकरे गटात उफाळून आलेली दासरी – बर्डे यांची गटबाजी.. भाजपकडून जाहीर न केलेली उमेदवारांची अधिकृत यादी… राष्ट्रवादी अजितदादा गट आणि शिंदे सेनेची झालेली युती…भाजपमध्ये गेलेल्यांना उमेदवारी न देण्याबाबतची टांगती तलवार.. काँग्रेस मधील उमेदवारी जाहीर करून देखील सुरू झालेली गळती.. या सर्व पार्श्वभूमीवर आज दुपारी तीन वाजता मोठा राजकीय भूकंप होईल असे दिसते. भाजपकडून पक्षाचे अधिकृत उमेदवार कोण आहेत याची यादी ऐनवेळी पावणेतीन वाजेपर्यंत दिली जाणार आहे. उद्या उमेदवारी अर्जांची छाननी होणार आहे तर 2 जानेवारी रोजी सकाळी 11 ते 2 या वेळेत उमेदवारी अर्ज मागे घेता येणार आहेत. त्यामुळे निवडणुकीच्या मैदानात किती उमेदवार हे दोन जानेवारी रोजी स्पष्ट होणार आहे. उमेदवारी मिळवण्यासाठी आज प्रत्येकाची होणारी धावपळ.. पळापळ.. टेन्शन सोलापूरकरांना पाहता येणार आहे.