श्री छत्रपती शिवाजी महाराज स्मारक मंडळ शिवस्मारकतर्फे २३ डिसेंबर रोजी सकाळी ११ वाजता कै. अनंतराव कुलकर्णी स्मृती जिल्हास्तरीय वक्तृत्व स्पर्धेचे आयोजन करण्यात आल्याची माहिती शिवस्मारकचे अध्यक्ष रंगनाथ बंकापूर यांनी सोमवारी पत्रकार परिषदेत दिली. शिंदे चौकातील शिवस्मारकच्या सभागृहात ही स्पर्धा होणार आहे.
५ वी ते ७ वी, ८ वी ते १० वी आणि महाविद्यालयीन गट अशा तीन गटांमध्ये ही स्पर्धा होईल. स्पर्धा मराठी आणि हिंदी भाषेत होणार असून स्पर्धकांनी ८ मिनिटांमध्ये विषय मांडणी करावयाची आहे. प्रवेशिका स्वीकारण्याची अंतिम मुदत २० डिसेंबर रोजी दुपारी तीन वाजेपर्यंत राहणार आहे.
स्पर्धेसाठीचे गट आणि विषय पुढीलप्रमाणे : गट ५ वी ते ७ वी : विषय – शिवराय आणि त्यांचे सवंगडी, माझी शाळा सुंदर शाळा स्वच्छ शाळा, माझा आवडता खेळाडू भारतमाता आमुची माता, सोलापूरचे चार अमर हुतात्मे. गट ८ वी ते १० वी : विषय – लाल महालावरील छापा, सोलापूरची खाद्यसंस्कृती, सोलापूर भुईकोट किल्ला, पुण्यश्लोक अहिल्यादेवी, डीजेमुक्त सोलापूर. महाविद्यालयीन गट : विषय – महाराजांची युद्धनीती, ऑपरेशन सिंदूरचे धाडस, राष्ट्रभक्तीचा महामंत्र वंदे मातरम, धर्मक्षेत्र सोलापूर, एआय मानवतेसाठी वरदान, राष्ट्रीय स्वयंसेवक संघ राष्ट्रसेवेची शतकपूर्ती
स्पर्धेसाठी प्रवेश निशुल्क आहे. प्रत्येक गटातून स्वतंत्र पारितोषिके देण्यात येणार असून प्रथम पारितोषिक ३ हजार रुपये, दुसरे पारितोषिक २ हजार रुपये तर तिसरे पारितोषिक १ हजार रुपये देण्यात येणार आहे. सर्व विजेत्यांना स्मृतिचिन्ह आणि प्रमाणपत्र तर प्रत्येक सहभागी स्पर्धकास प्रमाणपत्र देण्यात येणार आहे.
श्री छत्रपती शिवाजी महाराज स्मारक मंडळ शिवस्मारकतर्फे आयोजित कै. अनंतराव कुलकर्णी स्मृति शालेय व महाविद्यालय जिल्हास्तरीय वक्तृत्व स्पर्धेत विविध शाळा आणि महाविद्यालयाच्या अधिकाधिक संघांनी सहभाग घ्यावा, असे आवाहन शिवस्मारकचे सचिव गंगाधर गवसने यांनी केले.
या पत्रकार परिषदेस शिवस्मारकचे अध्यक्ष रंगनाथ बंकापूर,शिवस्मारकचे सचिव गंगाधर गवसने,संचालक प्रा. देवानंद चिलवंत, संचालक आणि स्पर्धाप्रमुख प्रसाद जीरांकलगीकर, संचालक, व्यवस्थापक मल्लिनाथ व्हटकर उपस्थित होते.
