राज्य निवडणूक आयोगाची चूक म्हणा किंवा राज्यातील आठ महापालिकेतील प्रशासकांची चूक म्हणा.. यामुळे सोलापूर सह राज्यातील आठ महापालिकांमध्ये सोमवारी पुन्हा आरक्षण सोडत करण्यात आली. कोणाची तक्रार नसताना राज्य निवडणूक आयोगाच्या सूचनेनुसार आज पुन्हा सोलापूर महापालिकेसाठी हुतात्मा स्मृती मंदिरात आरक्षण सोडत काढण्यात आली . यावेळी खूप कमी उपस्थिती होती. तर गोंधळात गोंधळ असल्यामुळे प्रशासकीय अधिकारी देखील आरक्षण सोडत काढताना बराच वेळ गॅप घेत होते. सोलापूर महापालिकेच्या 102 जागा आहेत यामध्ये कोणतीही वाढ किंवा कमी झाली नाही मात्र आरक्षण बदलण्यात आले आहे. ओबीसींच्या 27 जागा असून त्यातील 14 जागांवर आज पुन्हा नव्याने महिला आरक्षण काढण्यात आले. तर खुल्या प्रवर्गातील 58 जागा असून यातील 28 जागांचे महिला आरक्षण पुन्हा काढण्यात आले. सर्वच प्रभागांमध्ये एक- एक खुल्या प्रवर्गातील महिला तसेच ओबीसी महिलेचा समावेश आहे.
प्रभाग क्रमांक सात मध्ये पूर्वी दोन सर्वसाधारण, एक सर्वसाधारण महिला आणि एक ओबीसी महिला अशी आरक्षण होते ते आता दोन सर्वसाधारण महिला, एक ओबीसी महिला आणि एक सर्वसाधारण पुरुष असे आरक्षण झाले आहे त्यामुळे सर्वात जास्त चुरस असलेल्या या प्रभागात अनेकांची महिलांनी अडचण केली आहे . प्रभाग क्रमांक आठ आणि प्रभाग क्रमांक नऊ मध्ये देखील महिला आरक्षणामुळे अनेकांची गोची निर्माण झाली आहे. प्रभाग क्रमांक 15 मध्ये पूर्वी एक जागा सर्वसाधारण महिलेसाठी राखीव होती आता दोन्ही जागा सर्वसाधारण झाल्या आहेत. याबाबत उपस्थित काही माजी नगरसेवकांनी हरकती देखील घेतल्या मात्र आयुक्तांनी याबाबत आपल्याला काहीही अधिकार नाही तुम्ही कोर्टात जावा नाहीतर निवडणूक आयोगाकडे तक्रारी करा असे सांगितले. आता 19 नोव्हेंबर रोजी प्रारूप आरक्षण प्रसिद्ध केले जाणार असून 25 नोव्हेंबर पर्यंत आरक्षणावर हरकती घेता येतील तर दोन डिसेंबर रोजी अंतिम आरक्षण राजपत्रात प्रसिद्ध होणार आहे.
