सचिव पातळीवरील अधिकारी एखाद्या साहित्यिक कार्यक्रमाला उपस्थित राहतात, हे विरळाचं, पण असे घडले सोलापुरात . प्रिसिजन वाचन अभियानाच्या निमित्ताने डॉ. किरण कुलकर्णी या कर्तव्यनिष्ठ प्रशासकीय अधिकाऱ्याने केवळ उपस्थितीच नाही, तर साहित्य आणि भाषेविषयीची जाणिव आणि बांधिलकी स्पष्टपणे मांडली.
“एखादा शासकीय अधिकारी कवी किंवा साहित्यिक असू नये का?” हा प्रश्न उपस्थित करत त्यांनी ठामपणे सांगितले की, अशा अधिकाऱ्यांची संख्या कमी आहे, ही आपल्या समाजाची उणीव आहे.
सोलापूरमध्ये सुरु असलेला प्रिसिजन वाचन अभियान हा कार्यक्रम केवळ सोलापुरापुरता मर्यादित न ठेवता संपूर्ण महाराष्ट्रात पोहोचवावा, यासाठी मी स्वतः येथे आलोय, असे त्यांनी आवर्जून सांगितले. हे अभियान अभ्यासपूर्ण पद्धतीने संपूर्ण महाराष्ट्रात सादर करता येईल, असा विश्वास त्यांनी व्यक्त केला.
मराठी भाषेच्या प्रगतीसाठी आणि टिकवण्यासाठी त्यांनी महत्त्वाचे मुद्दे मांडले. “मराठी ही केवळ राज्यभाषा नाही, तर अभिजात भाषा आहे. जगभरातील 74 देशांमध्ये मराठी भाषिक आहेत आणि 17 देशांमध्ये मराठी भाषेच्या संवर्धनासाठी अनेक योजना चालू आहेत. भाषेचं जतन आणि संवर्धन हे प्रत्येक भाषाप्रेमीचं कर्तव्य आहे,” असं त्यांनी सांगितलं.
केंद्र सरकारच्या भाषिणी अॅपचा उल्लेख करत, त्यांनी जुन्या शब्दसंपत्तीच्या संवर्धनावर भर दिला. “दिवाळी अंक 1909 पासून सुरू आहेत, विश्वकोश हा मराठी भाषेचा मानबिंदू आहे. ही परंपरा जपणं आवश्यक आहे,” असंही त्यांनी नमूद केलं.
“सोलापूर हे फक्त चादरीचं नव्हे, तर वाचणाऱ्यांचे गाव व्हावं,” असा प्रेरणादायी संदेश युनिक फिचर्सचे संचालक आनंद अवधानी यांनी केलं.
कार्यक्रमाच्या सुरुवातीला डॉ. किरण कुलकर्णी आणि युनिक फिचर्सचे प्रकाशक आनंद अवधानी यांचा डॉ. सुहासिनी शहा यांच्या हस्ते सन्मान करण्यात आला. कार्यक्रमाचं सुत्रसंचालन आणि आभारप्रदर्शन माधव देशपांडे यांनी केलं.
या कार्यक्रमासाठी सोलापुरातील साहित्यप्रेमी मोठ्या संख्येने उपस्थित होते.
