सोलापूर – सोलापूर महानगरपालिकेच्या वतीने आज शाळेच्या पहिल्या दिवशी कॅम्प शैक्षणिक संकुल येथे विद्यार्थ्यांचे प्रवेश उत्सव साजरा करण्यात आला. यावेळी सोलापूर महानगरपालिकेचे आयुक्त यांच्या हस्ते विद्यार्थ्यांना गुलाब पुष्प देऊन त्यांचे शाळेत स्वागत करण्यात आले. प्रारंभी महापालिकेच्या आयुक्त व मान्यवरांच्या हस्ते दीप प्रज्वलन करून कार्यक्रमाची सुरुवात करण्यात आली. या कार्यक्रमाच्या प्रास्ताविकामध्ये उपायुक्त तैमूर मुलाणी यांनी महिला व बालकल्याण विभागाकडून सर्व मनपा शाळेतील विद्यार्थ्यांना दप्तर व पाण्याची बाटली हे साहित्य माननीय आयुक्त यांच्या मार्गदर्शनाखाली वाटप करण्यात येणार असल्याचे ही सांगितले. त्यानंतर महानगरपालिकेच्या आयुक्त डॉ. सचिन ओम्बासे यांच्या हस्ते मनपा कॅम्प शाळा आवारातील विद्यार्थ्यांना पाठ्यपुस्तके ,गणवेश, बूट व पायमोजे इत्यादी साहित्यांचे वाटप करण्यात आले.
या कार्यक्रमास उपस्थित विद्यार्थी व शिक्षकांना मार्गदर्शन करताना आयुक्त यांनी पायाभूत साक्षरता व संख्याज्ञान या कार्यक्रमाची उद्दिष्टे साध्य करण्यासाठी सर्वांनी प्रयत्न करणे आवश्यक असल्याचे सांगितले. विद्यार्थ्यांनी देखील आपल्या वर्गातील इतर सहअध्यायांना गणिती क्रिया व वाचन कौशल्य विकसित होण्यासाठी मदत करावी असे सांगितले.यावेळी विद्यार्थ्यांना नवीन शैक्षणिक वर्षाच्या पहिल्या दिवसाच्या आयुक्त यांनी शुभेच्छा दिल्या.त्याचबरोबर समग्र शिक्षा अंतर्गत दृष्टीदोष असणाऱ्या विद्यार्थ्यांना ठळक अक्षरातील पाठ्यपुस्तकाचे वाटप देखील माननीय आयुक्तांच्या हस्ते करण्यात आले. या कार्यक्रमास कॅम्प आवारातील विद्यार्थी, शिक्षक, उपस्थित होते. हा कार्यक्रम यशस्वी करण्यासाठी मुख्याध्यापिका जगन्नाथ सज्जन , बंदुकवाले , श्रीमती रेहाना नदाफ, आनंद सामल, श्रीमती महेजबीन मुल्ला, योगेश रंगम, मोसिना मुजावर , नाजनिन कोरबू या सर्व मुख्याध्यापकांनी परिश्रम घेतले. सदर कार्यक्रमाचे सूत्रसंचालन स्नेहा पुजारी यांनी केले उपस्थित यांचे आभार पर्यवेक्षक भगवान मुंढे यांनी मानले.
