श्री शिवराज्याभिषेक अर्थात हिंदूसाम्राज्य दिनानिमित्त पालखी सोहळा : श्री शिवराज्याभिषेक सोहळा समितीतर्फे आयोजन
सोलापूर – पुण्यश्लोक छत्रपति शिवाजी महाराज की जय, धर्मवीर छत्रपति श्री संभाजी महाराज की जय, भारतमाता की जय, हिंदू धर्म की जय अशा घोषणांच्या निनादात अन् श्री शिवछत्रपतिंच्या जयघोषात शुक्रवारी शहरातून पालखी मिरवणूक उत्साहात झाली.
हिंदवी स्वराज्याचे संस्थापक छत्रपति श्री शिवाजी महाराजांच्या ३५२ व्या श्री शिवराज्याभिषेक दिनानिमित्त अर्थात हिंदूसाम्राज्य दिनानिमित्त श्री शिवराज्याभिषेक सोहळा समितीतर्फे
गुरुवर्य श्री संभाजीराव भिडे गुरुजी यांच्या मार्गदर्शनाखाली मंगळवारी शहरातून पालखी सोहळा उत्साहात झाला. प्रेरणामंत्राने मिरवणुकीचा प्रारंभ झाला. प्रारंभी प्रख्यात गायक अवधूत गांधी आणि सोलापूर जिल्हा लेबर फेडरेशनचे संचालक संजय साळुंखे यांच्या हस्ते भगव्या ध्वजाचे आणि छत्रपति श्री शिवरायांच्या मूर्तीचे पूजन ग्रामदैवत श्री सिद्धरामेश्वर मंदिरात झाले. याप्रसंगी प्रख्यात तालवादक आणि विश्वनायक वाद्यवृंद पथकाचे नागेश भोसेकर यांची प्रमुख उपस्थिती होती.
या पालखी मिरवणुकीच्या अग्रभागी भगवा ध्वज होता. त्यामागे शिवकालीन मर्दानी खेळ सादर झाले. त्यामागे श्री शिवराज्याभिषेक सोहळा समितीच्या कार्यकर्त्यांनी लेझीमचे आकर्षक डाव सादर केले. तसेच ट्रेडिशनल दांडपट्टा स्पोर्ट्स असोसिएशन यांनी शिवकालीन दांडपट्टा, लाठी काठी, पारंपरिक तलवारबाजी आदींचे सादरीकरण केले.
या पालखी मिरवणुकीत विविध चित्ररथ सादर करण्यात आले. यात श्री तुळजाभवानी देवी, गडावर बसलेले छत्रपति श्री शिवराय, राष्ट्रमाता जिजाऊ आऊसाहेब असा देखावा होता. सर्वात शेवटी छत्रपति श्री शिवरायांची सजवलेली पालखी होती.
मिरवणूक मार्गावरील श्री गणपती मंदिर, ग्रामदैवत श्री सिद्धरामेश्वर मंदिर, श्री सरस्वती मंदिर, श्री दत्त मंदिर, श्री विठ्ठल मंदिर या पाच मंदिरांचे दर्शन घेत पालखी मिरवणूक मार्गस्थ झाली. पालखी मिरवणुकीचे नागरिकांनी ठिकठिकाणी पुष्पवृष्टी करीत स्वागत केले.
ग्रामदैवत श्री सिद्धरामेश्वर मंदिरात सुरुवात झालेली ही देवदर्शन पदयात्रा डॉ. बाबासाहेब आंबेडकर चौक, सरस्वती चौक, मेकॅनिक चौक मार्गे छत्रपती श्री शिवाजी महाराज चौकात विसर्जित झाली. ध्येयमंत्राने मिरवणुकीचा शेवट झाला. यावेळी हिंदू बांधवांनी मोठी गर्दी केली होती.
