वाळूचे अवैध उत्खननावर केलेल्या कारवाईत 81 कोटीची रक्कम तर 32 वाहनेही जप्त
सोलापूर, दिनांक 30 (जिमाका) :- गौण खनिजाच्या अवैध वाहतूक, उत्खनन व साठ्याच्या प्रकरणांत महाराष्ट्र जमीन महसूल संहिता 1966 मधील कलम 48(7) नुसार गौण खनिजाच्या बाजार मुल्याच्या पाच पटापर्यंत दंडाच्या रकमेची परिगणना करून नियमानुसार स्वामित्वधन व दंडाची रक्कम वसुल करण्याची, तसेच कलम 48(8) नुसार अवैध उत्खननाकरीता वापरण्यात आलेली यंत्रसामुग्री व वाहतुककरीता वापरण्यात आलेली वाहने जप्त तरतुद आहे.
यानुसार सोलापूर जिल्ह्यात गौण खनिजाचे अवैध उत्खनन, वाहतूक व साठा प्रकरणांत कारवाई करण्याचे अनुषंगाने जिल्हा स्तरावर व तहसिल स्तरावरून पथक गठित करण्यात आले आहेत.
दिनांक 28 सप्टेंबर 2024 रोजी मौजे खातगाव क्रं.02 ता. करमाळा येथे अवैध वाळू उत्खनन चालू असल्याचे प्राप्त गोपनीय माहितीवरून त्या ठिकाणी कारवाई करण्यात आली आहे. या कारवाईमध्ये साधारण 60 ब्रास वाळू साठा जप्त करणत आला आहे. संबंधित अवैध वाळू उत्खनन करून साठा करण्यावर तहसिलदार करमाळा यांचेस्तरवरून दंडात्मक कारवाई प्रस्तावित करण्यात आलेली आहे.ही कारवाई जिल्हाधिकारी कुमार आशीर्वाद यांचे मार्गदर्शनानुसार जिल्हास्तरीय गठित करण्यात आलेले उपविभागीय अधिकारी माळशिरस यांच्या अधिनस्त पथकामार्फत करण्यात आली आहे, असे उपजिल्हाधिकारी महसूल अमृत नाटेकर यांनी सांगितले.
जिल्ह्यात अवैध गौण खनिजाच्या विविध प्रकरणांत एप्रिल 2024 ते ऑगस्ट 2024 अखेर पर्यंत केलेल्या कारवाईमध्ये अवैध वाहतूक व उत्खननच्या आढळून आलेल्या एकुण प्रकरणे 179 आहेत. या सर्व प्रकरणांत एकुण रक्कम रुपये 81.62 कोटी दंड आकारण्यात आलेले आहेत. ही दंडात्मक कारवाई व्यतिरिक्त फौजदारी कारवाईमध्ये वरील नमुद कालावधीत एकुण 37 गुन्हे दाखल करण्यात आलेले आहेत. तसेच गौण खनिजाच्या अवैध उत्खनन व वाहतुकीच्या विविध प्ररणांत वापर करण्यात आलेले एकुण 32 वाहने इतर 6 यंत्रसामग्री जप्त करण्यात आले आहेत, अशी माहिती उपजिल्हाधिकारी महसूल अमृत नाटेकर यांनी दिली.
