सोलापूर दि.25 (जिमाका) :- अटल भूजल योजनेच्या अंमलबजावणीमध्ये अधिकधिक लोकांनी सहभागी व्हावे व सर्वांनी गावातील भूजल व्यवस्था शाश्वत राखण्यासाठी सहभाग नोंदवावा, यासाठी गावा-गावांमध्ये सदृढ स्पर्धा निर्माण होण्यासाठी अटल भूजल योजनेंतर्गत भूजल समृद्ध ग्राम स्पर्धेचे आयोजन करण्यात आले होते. सन २०२२-२३ या वर्षासाठी भूजल समृद्ध ग्राम स्पर्धेचा निकाल जाहीर झाला असून जिल्ह्यात माढा तालुक्यातील भेंड ग्रामपंचायतीला जिल्हास्तरावर प्रथम क्रमांकाचा 50 लाख रुपयांचा पुरस्कार जाहीर झाला आहे. तसेच माढा तालुक्यातील लोंढेवाडी ग्रामपंचायतीला व्द‍ितीय व सालंकरवाडी ग्रामपंचायतीला तृतीय क्रमांकाचा पुरस्कार जाहीर झाला आहे.
भूजलाच्या अनियंत्रीत उपशामुळे भूजल पातळीत होत असलेली घसरण व बाधित होत असलेली गुणवत्ता थांबविण्यासाठी मागणी व पुरवठा व्यवस्थापन प्रणालीच्या प्रभावी अमंलबजावणीद्वारे सहभागीय भूजल व्यवस्थापन, अधिकाधिक सशक्त करण्यासाठी केंद्र शासन व जागतिक बँक अर्थसहाय्यीत अटल भूजल योजना राज्यातील १३ जिल्ह्यातील ४३ तालूक्यामधील १ हजार १३३ ग्रामपंचायतींमध्ये सरु आहे.
लोकसहभागातून भुजल व्यवस्थापन करणे हा योजनेचा गाभा आहे. यासाठी ग्रामस्तरावर जल अंदाजपत्रक तयार करणे, भूजल उपलब्धतेतील तूट भरून काढण्यासाठी अस्तित्वातील राज्य व केंद्र पुरस्कृत योजनांचे अधिकाधिक अभिसरण करणे, ग्रामस्तरावरील भूजल उपलब्धतेत शाश्वतता साध्य करणे, हे योजनेचे उदीष्ट आहे. राज्यातील पुणे, सातारा, सांगली, सोलापूर, नाशिक, अहमदनगर, जळगाव, जालना, लातूर, धाराशीव, बुलढाणा, अमरावती, नागपूर या 12 जिल्ह्यातील 270 ग्रामपंचायतींनी स्पर्धेमध्ये सहभाग घेतला होता.
या स्पर्धेचे मूल्यांकन उपविभागस्तर, जिल्हास्तर व राज्यस्तर या तीन स्तरावर करण्यात आले. यामध्ये सोलापूर जिल्ह्यातील माढा तालुक्यातील भेंड ग्रामपंचायतीला जिल्हास्तरावर प्रथम क्रमांकाचा 50 लाख रुपयांचा पुरस्कार जाहिर झाला आहे. तसेच माढा तालुक्यातील लोंढेवाडी ग्रामपंचायतीला व्द‍ितीय क्रमांकाचा 30 लाख रुपयांचा तर सालंकरवाडी ग्रामपंचायतीला तृतीय क्रमांकाचा 20 लाख रुपयांचा पुरस्कार जाहीर झाला आहे.
