सोलापूर : दोन हजार रुपयांची नोट आता १ ऑक्टोबरपासून चलनातून बाद होणार आहे. नोटा बदलून घेण्यासाठी रिझर्व्ह बॅंकेने आजपर्यंत मुदत दिली आहे. दरम्यान, आतापर्यंत सोलापूर शहर-जिल्ह्यातून २७३ कोटी ६४ लाख ३० हजार रुपये (१३ लाख १८ हजार २१५ नोटा) बॅंकांमध्ये जमा झाले आहेत. बहुतेक लोकांनी त्यांच्याकडील नोटा बॅंकांमध्ये यापूर्वीच जमा केल्या आहेत. आता नोटा बॅंकेत जमा करण्यासाठी एकच दिवस शिल्लक राहिला आहे, पण त्यादिवशी बॅंका बंद असणार आहेत. १ ऑक्टोबरपासून आता दोन हजारांची नोट चलनात नसणार आहे. काही दिवसांत त्यावर पर्याय म्हणून नव्या रूपात एक हजारांची नोट येईल, असे बॅंकेच्या वरिष्ठ अधिकाऱ्यांनी सांगितले.
वेळेत तुम्ही तुमच्याकडील दोन हजाराच्या नोटा बदलून घेतल्या नाहीत, तर ३० सप्टेंबरनंतर त्या नोटा स्वीकारल्या जाणार नाहीत. त्यातून मोठे आर्थिक नुकसान सहन करावे लागू शकते. काही दिवसांपासून बँकांमध्ये दोन हजारांच्या नोटा जमा करण्याचे प्रमाण कमी असून दिवसाला एक- दोन नोटा जमा होत आहेत. अशी माहिती व्यवस्थापक, जिल्हा अग्रणी बॅंक, सोलापूरचे प्रशांत नाशिककर यांनी दिली.