राज्य उत्पादन शुल्क विभागाच्या पथकाने २५ फेब्रुवारी रोजी करमाळा तालुक्यातील नेर्ले गावाच्या हद्दीत एका रेनॉल्ट डस्टर गाडीतून एक लाख ५३ हजार सहाशे किमतीचे गोवा राज्यातील दारू जप्त केली आहे.
सविस्तर वृत्त असे की, राज्य उत्पादन शुल्क विभागाच्या करमाळाच्या पथकाचे दुय्यम निरीक्षक शंकर पाटील यांना २५ फेब्रुवारी रोजी मिळालेल्या खात्रीलायक बातमीनुसार त्यांनी जवान विकास वडमिले यांच्यासह करमाळा तालुक्यातील नेर्ले गावाच्या हद्दीत पाळत ठेवली असता त्यांना एका रेनॉल्ट डस्टर क्रमांक MH48 P 0388 या चारचाकी वाहनातून गोवा राज्य निर्मित व विक्रीस असलेले इम्पेरियल ब्ल्यू व्हिस्की १८० मिलीच्या ९६० बाटल्या वाहतूक होत असल्याचे आढळून आले. सदर गुन्ह्यात त्यांनी वाहन चालक निलेश लालासाहेब पडवळे, वय ३१ वर्षे, राहणार उमरड, ता.करमाळा याला ताब्यात घेऊन त्याचेविरुद्ध महाराष्ट्र दारूबंदी कायदा १९४९ चे कलमांतर्गत गुन्हा नोंदवला तसेच त्यास २६ फेब्रुवारी रोजी मा. न्यायालयासमक्ष हजर केले असता मा. प्रथम वर्ग न्यायदंडाधिकारी यांनी आरोपीस एका दिवसाची पोलीस कस्टडी सुनावली आहे. या गुन्ह्यात एक लाख त्रेपन हजार सहाशे रुपये किमतीच्या गोवा दारूसह एकूण पाच लाख तेहतीस हजार सहाशे किंमतीचा मुद्देमाल राज्य उत्पादन शुल्क विभागाने हस्तगत केला आहे. या कारवाईत निरिक्षक सदानंद मस्करे, सहायक दुय्यम निरीक्षक गजानन होळकर, महावीर कोळेकर, जवान अनिल पांढरे यांनी सहकार्य केले.
एका अन्य कारवाईत राज्य उत्पादन शुल्क विभागाच्या दुय्यम निरीक्षक उषाकिरण मिसाळ यांनी जवान शोएब बेगमपुरे यांचेसह २६ फेब्रुवारी रोजी सकाळच्या सुमारास दक्षिण सोलापूर तालुक्यातील हत्तुर गावाचे हद्दीत चांगदेव मंगलू राठोड, वय ४५ वर्षे, राहणार कोंडी तांडा, ता. उत्तर सोलापूर हा इसम त्याच्या दुचाकीवरून १२० लिटर हातभट्टी दारूची वाहतूक करताना आढळून आल्याने त्याला ताब्यात घेऊन त्याचे विरुद्ध गुन्हा नोंदविण्यात आला आहे. या कारवाईत रुपये पासष्ट हजार पाचशे पन्नास किमतीचा मुद्देमाल जप्त केला आहे. तसेच राज्य उत्पादन शुल्क विभागाच्या सीमा तपासणी नाका नांदणीच्या पथकाने २५ फेब्रुवारी रोजी अक्कलकोट तालुक्यातील तडवळ परिसरात दोन मोटरसायकलींसह २०० लिटर ताडी जप्त केली असून आबादास चिंचोळ या इसमास अटक केली असून एक आरोपी फरार असून त्याचा शोध सुरू आहे. ही कारवाई निरीक्षक गुलाब जाधव, सहायक दुय्यम निरिक्षक मुकेश चव्हाण, जवान योगिराज तोग्गी, वसंत राठोड यांनी पार पाडली.
आवाहन
राज्य उत्पादन शुल्क विभागाने गोवा दारू तसेच हातभट्टी दारूच्या अवैध वाहतूकीवर विशेष लक्ष ठेवले असून विशेष पथकांमार्फत याविरुद्ध कारवाई करण्यात येत आहे. नागरिकांना अवैध दारूच्या तक्रारी असल्यास या विभागास त्याची माहिती द्यावी, असे आवाहन राज्य उत्पादन शुल्क विभागाचे अधीक्षक नितीन धार्मिक यांनी केले आहे.
