विमानसेवा आणि पंढरीचा विकास यावर देवेंद्र फडणवीस काय बोलणार?

सोलापूर : उपमुख्यमंत्री देवेंद्र फडणवीस हे आज आणि उद्या सोलापूर जिल्हा दौऱ्यावर येत आहेत. मुंबईतून विशेष विमानाने गुरुवारी सायंकाळी पाच वाजता सोलापूर विमानतळावर त्यांचे आगमन होणार आहे .त्यानंतर हेलिकॉप्टरने पंढरपूरला जाणार असून उद्या कार्तिकी एकादशीची पूजा केल्यानंतर बार्शी आणि मंगळवेढा येथे हेलिकॉप्टरनेच दौरा होणार आहे. या दौऱ्यात ते पंढरपूर विकासासंदर्भात तसेच चंद्रभागेच्या प्रदूषणासंदर्भात काय बोलणार याकडे लक्ष लागले आहे .शिवाय मुख्यमंत्री, विरोधी पक्षनेता ते आता उपमुख्यमंत्री या प्रत्येक पदावर असताना सोलापूरच्या विमानसेवेचा आणि सिद्धेश्वर च्या बेकायदेशीर चिमणी चा विषय त्यांना माहित आहे . चिमणी मुळे तुमच्या विमानाला अपघात होऊ शकतो तुम्ही सोलापूर विमानतळावर येऊ नका असा इशारा देखील सोलापूर विकास मंचने दिला आहे .या पार्श्वभूमीवर सोलापूरच्या रखडलेल्या विमान सेवे संदर्भात देवेंद्र फडणवीस काय बोलणार याकडे सोलापूर जिल्ह्याचे लक्ष लागले आहे . उपमुख्यमंत्री झाल्यानंतर प्रथमच ते सोलापूर जिल्ह्यात येत आहेत त्यामुळे ते जिल्ह्याला काय काय देणार याची उत्सुकता आहे