सोलापूर झेडपीचे सीईओ दिलीप स्वामी यांचा ‘असाही’ नवा पॅटर्न

येस न्युज मराठी नेटवर्क : सोलापूर जिल्हा परिषदेचे मुख्य कार्यकारी अधिकारी दिलीप स्वामी यांनी नवनवीन प्रयोग करत ग्रामीण भागात रुग्णांना दिलासा देण्याबरोबरच प्रशासनात टेन्शन फ्री काम कसे करता येईल याबाबत प्रयत्न सुरू केले आहेत. सोलापूरच्या ग्रामीण भागात दररोज दोन हजाराच्या आसपास कोरोना चे रुग्ण आढळू लागले आहेत. त्यामुळे अशा रुग्णांना गावातच उपचार करता यावेत म्हणून महाराष्ट्र दिनापासून सोलापूर जिल्ह्यातील 100 गावात कोवीड केअर सेंटर सुरू केले जात आहे. महिला रुग्णांवर महिला डॉक्टरच उपचार करतील असे त्यांनी ठरविले आहे . सोलापूर शहराच्या मध्यवर्ती भागात जिल्हा परिषदेचे नेहरू होस्टेल आहे. या ठिकाणीदेखील पन्नास बेडचे कोवीड हॉस्पिटल सुरू करण्यासाठी प्रयत्न सुरू आहेत.रुग्णांशी जास्तीत जास्त संवाद साधता यावा तसेच वेळेत उपचार यावे मिळावेत यासाठी जिल्हा परिषदेच्या वतीने कंत्राटी वैद्यकीय अधिकाऱ्यांची भरती प्रक्रिया सुरू केली आहे. कोरोनाच्या ड्युटीवर असणाऱ्या कर्मचाऱ्यांना टेन्शन फ्री राहण्यासाठी त्यांनी विविध उपक्रम देखील सुरु केले आहेत त्यामुळे निश्चितच जिल्हा परिषदेचा दिलीप स्वामी पॅटर्न आपले वेगळेपण दाखवू लागला आहे.