येस न्युज मराठी नेटवर्क ; छत्रपती शिवाजी महाराज यांच्या जयंतीच्या निमित्ताने – जुलै 2018 साली राईनपाडा हत्याकांडात मृत्युमुखी पडलेल्या स्व.भारत माळवे यांच्या कुटुंबियांना भाजपा जिल्हा संघटन सरचिटणीस शशिकांत चव्हाण यांच्या शुभहस्ते व युवा ग्रामपंचायत सदस्य विकास वाघमारे यांच्या उपस्थितीत पिठाणी गिरणी भेट देत अनोख्या पद्धतीने शिवजयंती साजरी करण्यात आली.
जुलै 2018 मध्ये राईनपाडा जि. धुळे या ठिकाणी डवरी गोसावी समाजातील पाच व्यक्तिंचे अफवेमुळे हत्याकांड झाले होते, त्यातील दुर्दैवी मृत व्यक्ती हे खवे, ता. मंगळवेढा येथील होते, मागच्याच महिन्यात मुख्यमंत्री वैद्यकीय सहाय्यता कक्षाचे माजी कक्षप्रमुख ओमप्रकाश शेटे यांनी स्व. भारत माळवे यांचा 11 वर्षीय सुपूत्र कु. चंद्रकांत माळवे याला एक लाख रुपयांचा धनादेश खवे ता. मंगळवेढा येथे घरी जाऊन भेट दिला होता. त्याच्या शिक्षणाची जबाबदारीही ओमप्रकाश शेटे यांनी घेतली आहे. दरम्यान याची माहिती युवा ग्रामपंचायत सदस्य विकास वाघमारे यांनी सोशल मीडियावर राज्यभरात प्रसारित केल्यानंतर ठाण्यातील प्राध्यापक उपेंद्र जोशी यांनी त्या माळवे कुटुंबियांना मदत करण्याची इच्छा व्यक्त केली. विकास वाघमारे यांनी ओमप्रकाश शेटे यांच्याशी चर्चा केल्यानंतर त्या माळवे कुटुंबियांना कायम स्वरूपी आर्थिक व्यवस्था होणेसाठी घरातच उत्पन्न मिळावे यासाठी पिठाची गिरणी भेट देण्याचे ठरले आणि शिवजयंतीच्या शुभमुहूर्तावर भाजपा जिल्हा संघटन सरचिटणीस शशिकांत चव्हाण यांच्या शुभहस्ते ही गिरणी आज माळवे कुटुंबियांकडे सुपूर्द करण्यात आली.
सामाजिक भान म्हणून दातृत्वाचे अनेक हात पुढे येत असतात मात्र नेमकी मदत योग्य त्या ठिकाणी पोहचणे महत्वाचे असते. माळवे कुटुंबियांना ही मदत देत असताना त्यांना केवळ आर्थिक मदत न देता, व्यावसायिक दृष्टिकोन ठेऊन पिठाची गिरणी भेट देता आली, कु. चंद्रकांतच्या शिक्षणाची जबाबदारीही ओमप्रकाश शेटे यांनी घेतली आहे, शासनाचीही मदत त्या कुटुंबापर्यंत पोहचली आहे, या शिवजयंती निमित्ताने उपेंद्र जोशी यांनी पाठवलेली मदत ही सामाजिक जबाबदारी म्हणून पार पाडता आली याचा आनंद झाला असल्याचे मत भाजपा जिल्हा संघटन सरचिटणीस शशिकांत चव्हाण यांनी बोलताना व्यक्त केले.
यावेळी भाजपा युवा नेते तथा ग्रामपंचायत सदस्य विकास वाघमारे, सुदर्शन यादव, सुशांत हजारे, निवृत्त सैनिक शिवाजी शिंदे, चंद्रकांत पाटील, राहुल चोरमुले, बाबर सर, मारुती भोसले आदी पदाधिकारी व नागरिक उपस्थित होते.
