सोलापूर विद्यापीठात १९ महाविद्यालयांतील १२५० स्वयंसेवकांचे श्रमदान
सोलापूर – पुण्यश्लोक अहिल्यादेवी होळकर सोलापूर विद्यापीठाच्या ४८२ एकर परिसरात राष्ट्रीय सेवा योजना विभागाच्या वतीने आयोजित निवासी विशेष श्रमसंस्कार साखळी शिबिराचा शुभारंभ सोमवारी झाला. विद्यापीठाशी संलग्न शहरातील विविध १९ महाविद्यालयांमधील एकूण १२५० विद्यार्थी स्वयंसेवक या शिबिरात सहभागी होत आहेत. कुलगुरू डॉ. प्रकाश महानवर यांच्या मार्गदर्शनाखाली या उपक्रमाची सुरुवात करण्यात आली असून पुढील दीड महिनाभर शिबिरामध्ये विविध शैक्षणिक व सामाजिक उपक्रम राबविण्यात येणार आहेत.
विद्यापीठाचे प्र-कुलगुरू डॉ. लक्ष्मीकांत दामा, प्रभारी कुलसचिव डॉ. अतुल लकडे, तसेच राष्ट्रीय सेवा योजना विभागाचे संचालक डॉ. राजेंद्र वडजे यांच्या मार्गदर्शनाखाली सदरील शिबिरात विविध उपक्रम राबविले जाणार आहेत. २४ नोव्हेंबर ते २८ डिसेंबर २०२५ या कालावधीत हे साखळी शिबिर टप्प्याटप्प्याने आयोजित केले जाणार आहे. स्वयंसेवकांकडून श्रमदानाद्वारे वृक्षारोपण, बिजारोपण, परिसर स्वच्छता तसेच इतर शाश्वत विकासाशी संबंधित उपक्रम राबविले जातील. यासोबतच दररोज योग, प्राणायाम, प्रार्थना, मैदानी खेळ, गटचर्चा यांचे आयोजन करण्यात आले आहे. विविध सामाजिक, पर्यावरणीय आणि वैयक्तिक विकास विषयांवरील तज्ज्ञांचे मार्गदर्शनपर व्याख्यानही शिबिरात घेण्यात येणार आहे.
शिबिरादरम्यान स्वयंसेवकांच्या कला, कौशल्य आणि सृजनशीलतेला वाव देण्यासाठी विविध सांस्कृतिक कार्यक्रमांचाही समावेश करण्यात आला आहे. विद्यापीठ परिसर सुशोभित करण्यासोबतच विद्यार्थ्यांमध्ये सामाजिक बांधिलकी, पर्यावरण जागरूकता आणि व्यक्तिमत्त्व विकासाची जाणीव वाढविण्याचे उद्दिष्ट या उपक्रमामागे असल्याचे डॉ. राजेंद्र वडजे यांनी सांगितले.
