तारळी प्रकल्पावरून राजू शेट्टी यांचा मुख्यमंत्री देवेंद्र फडणवीस यांच्यावर घणाघाती हल्ला
येस न्यूज मराठी: महाराष्ट्रातील प्रकल्प आणि नैसर्गिक साधनसंपत्तीच्या मुद्द्यावरून स्वाभिमानी शेतकरी संघटनेचे नेते राजू शेट्टी यांनी राज्य सरकारवर जोरदार टीका केली आहे. गुजरात ईस्ट इंडिया कंपनीसारखे वागत असून, गुजरात महाराष्ट्राला आपली वसाहत समजत आहे. तर मुख्यमंत्री देवाभाऊ हे गुजरातचे व्हाईसरॉय असल्यासारखे वागत आहेत, अशी घणाघाती टीका शेट्टी यांनी केली.
सातारा जिल्ह्यातील तारळी प्रकल्पाच्या आर्थिक व्यवहारांवरूनही त्यांनी प्रश्न उपस्थित केले आहेत. उपलब्ध माहितीनुसार, १,५०० मेगावॅट क्षमतेच्या तारळी प्रकल्पाची किंमत ५६७५ कोटी वरून फक्त ५६.७५ कोटी म्हणजे ९९ टक्के कपात करून दाखवली गेली आहे . त्यामुळे वन विभागास भरावयाची रक्कम २२७ कोटीवरून फक्त २. २७ कोटी इतकी कमी झाली आहे. विशेष म्हणजे वन विभागाकडून सुधारित प्रस्ताव स्वीकारण्यात आला असून प्रकल्पाच्या आर्थिक व्यवहारांबाबत चौकशीची मागणी केली जात आहे.
महाराष्ट्रातील महत्त्वाचे प्रकल्प, संसाधने आणि आर्थिक हितसंबंधांबाबत राज्य सरकारने ठाम भूमिका घ्यावी. गुजरातच्या हितासाठी महाराष्ट्राच्या हिताकडे दुर्लक्ष होत असेल, तर ते खपवून घेतले जाणार नाही, असा इशाराही राजू शेट्टी यांनी दिला आहे
