येस न्युज मराठी नेटवर्क : अर्थसंकल्पीय अधिवेशनाचा पहिला आठवडा सरला आहे. पहिल्या आठवड्यात विविध मुद्द्यांवरुन विरोधकांनी सरकारला कोंडीत पकडले आहे.आता दुसऱ्या आठवड्यात अर्थसंकल्प मांडला जाणार आहे. आता उरलेल्या दिवसात सरकार विरोधकांना निष्प्रभ करणार की विरोधक सरकार वर कुरघोडी करणार हे पाहणे उत्सुकतेचे ठरेल. हे अधिवेशन आठ दिवस चालणारे पहिले अधिवेशन आहे.
ज्यात विरोधकांनी सरकारची कोंडी केल्याचे चित्र पहिल्या पाच दिवसात दिसले.अर्थसंकल्पीय अधिवेशनाच्या पहिल्या दिवशी वीज प्रश्नावरून विरोधक आक्रमक झाले. विधान भवन बाहेर आणि आत आंदोलन केले. आपल्या भाषणात विरोधकांच्या राजकीय मुद्द्यांना मुख्यमंत्र्यांनी आपल्या शैलीत सडेतोड उत्तर तर दिली पण प्रशासकीय बाबींवर मात्र अपेक्षित उत्तर आले नाही.सभागृहात महाविकास आघाडी सरकारमधील तिन्ही पक्षांचा समन्वयाचा अभाव दिसून आला. पुरवणी मागण्या असो किंवा राज्यातील कायदा सुव्यवस्था या विषयावर विरोधी पक्षातील नेते आमदार भाषण करताना सरकारवर टीका करताना उपमुख्यमंत्री अजित पवार एकटे उत्तर देताना दिसले. राष्ट्रवादी आणि काँग्रेस मधील काही मंत्री आजारी याचा फटका या अधिवेशनात बसला. फ्लोअर मॅनेजमेंट करताना सरकार कमी पडले अससे चित्र होते . काही वेळा ज्या विभागावर चर्चा सुरू आहे. त्याचे मंत्री उपस्थित नसल्याची टीका विरोधकांनी केली. मंत्री सभागृहात उपस्थित नाही ही बाब वारंवार विरोधकांनी लक्षात आणून दिली. अंबानीच्या घराबाहेर सापडलेल्या गाडीच्या मालकाचा मृतदेह सापडला आणि याची माहिती गृह खात्याला नव्हती. विरोधी पक्षनेते इतकी माहिती देतात पण गृह खाते अंधारात हे चित्र समोर आले. यावर गृहमंत्री अनिल देशमुख आणि अनिल परब यांनी उत्तर दिले सावरून घेण्याचा प्रयत्न केला तरी सरकार बॅकफूटवर असल्याचे स्पष्ट झाले.आर्थिक पाहणी अहवालात कोरोनाची मोठा फटका राज्याच्या अर्थव्यवस्थेला बसल्याचे आर्थिक अहवालात दिसले. आठ मार्च रोजी अजित पवार अर्थसंकल्प मांडणार आहेत. आता उरलेल्या तीन दिवसात अर्थसंकल्प मंजूर करून घेणे,विधानसभा अध्यक्षपदाची निवडणूक हे सरकारपुढे आव्हान आहे.
