सोलापूर इ भविष्य निर्वाह निधी (पीएफ) खात्यातील रक्कम काढून देण्याच्या कामासाठी सहा हजार रुपयांची लाच स्वीकारताना ग्रंथपाल, अधीक्षकासह तिघांना लाचलुचपत प्रतिबंधक विभागाने (एसीबी) रंगेहाथ पकडले. ही कारवाई मंगळवारी सायंकाळी सुमारे ७ वाजण्याच्या दरम्यान सोलापूर येथील भविष्य निर्वाह निधी कार्यालय परिसरात करण्यात आली. या प्रकरणात अधीक्षक, वेतन पथक व भविष्य निर्वाह निधी कार्यालयाचे अधिक्षक लक्ष्मण लक्ष्मण दत्तात्रय बालवाड, वरिष्ठ लिपि क अण्णासाहेब दगडू मेटकरी तसेच श्रीमती रामबाई बाबूलाल सुराणा विद्यालय, चिकलठाण, ता. करमाळा येथील ग्रंथपाल विक्रम हरिश्चंद्र बारबोले यांच्यावर गुन्हा दाखल झाला आहे.
यातील अधीक्षक बालवाड आणि बारबोले यांना लाचलुचवत प्रतिबंधक विभागाने गुरुवारी सायंकाळी साडेसहाच्या सुमारास पैसे घेताना रंगेहात पकडले. तिघांच्या संमतीने बारबोले हा पैसे घेत होता.तक्रारदाराचे भविष्य निर्वाह निधीतील पैसे काढून देण्यासाठी आरोपींनी सहा हजार रुपयांची मागणी केल्याची तक्रार लाचलुचपत प्रतिबंधक विभागाकडे करण्यात आली होती.
तक्रारीची पडताळणी 15 जून रोजी केल्यानंतर सापळा रचण्यात आला. त्यानुसार भविष्य निर्वाह निधी कार्यालयात गुरुवारी लाचेची रक्कम स्वीकारताना आरोपींना रंगेहाथ पकडण्यात आले. विशेष म्हणजे शिक्षण विभागातील लिपिक घनश्याम मस्के याच्यावर फेब्रुवारी 2025 मध्ये कारवाई करण्यात आली होती.
ही कारवाई पोलीस अधीक्षक, लाचलुचपत प्रतिबंधक विभाग यांच्या मार्गदर्शनाखाली पोलीस उपअधीक्षक प्रशांत चौगुले यांच्या नेतृत्वाखालील पोलीस निरीक्षक शैलेश पवार, अमलदार सलीम मुल्ला यांच्या पथकाने केली. शिक्षण विभागाशी संबंधित अल्पावधीत झालेली ही दुसरी मोठी कारवाई मानली जात असून, या घटनेमुळे विभागात खळबळ उडाली आहे.
