TOP 25 – सिद्धेश्वर तलावात पुन्हा हजारो मासे तडफडू लागले…दुर्दैव सोलापूरकरांचे…!

सुमारे 36 एकर परिसरात असलेला विस्तीर्ण सिद्धेश्वर तलाव…. मध्यभागी ग्रामदैवत सिद्धेश्वराचे मंदिर… भोवताली इतिहासाचा साक्षीदार असलेला भुईकोट किल्ला… आणि भोवताली 1.6 किलोमीटर लांबीचा वॉकिंग ट्रॅक.. सोलापूरचा हा अनमोल खजिना… या परिसराला वारंवार कोणाची तरी नजर लागते आणि वर्षातून किमान दोन वेळा या तलावातील हजारो दुर्दैवी मासे मृत्युमुखी पडतात. काही ठिकाणी वॉटर फाउंटन बसून शासनाच्या माध्यमातून या तलावातील पाण्याचे प्रदूषण कमी करण्याचा प्रयत्न करण्यात आला मात्र त्याही उपाययोजना जुजबीज ठरल्या आहेत. काल सोलापुरात पाऊस झाला आणि यामुळे तलावात काही प्रमाणात पाणी मिसळले. पाण्याचे प्रदूषण वाढल्यामुळे पुन्हा हजारो मासे पाण्यातील ऑक्सिजन संपल्यामुळे हवेतील ऑक्सिजन घेण्यासाठी धडपड करू लागले आहेत. लक्ष्मी मार्केट कडील गेट पासून.. ते सिद्धेश्वर मंदिराच्या गेटपर्यंत येताना उजव्या बाजूला हजारो मासे रविवारी सकाळी तडफडताना दिसले. त्यामुळे पुन्हा हजारो मासे अखेरच्या घटका मोजत आहेत असे चित्र दिसू लागले. वर्षातून किमान दोन वेळा हजारो मासे अशाच पद्धतीने मरतात. महापालिका,प्रदूषण नियंत्रण मंडळ आणि सिद्धेश्वर देवस्थान यांनीच याबाबत आता ठोस उपाययोजना करणे गरजेचे आहे.