सोलापूरच्या वैद्यकीय क्षेत्रात मोठे यश—तज्ज्ञांकडून कौतुकाचा वर्षाव
सोलापूरातील एसीएस हॉस्पिटलमध्ये एकाच वेळी दोन अतिशय जटिल हृदय शस्त्रक्रिया यशस्वीपणे पार पडल्या आहेत. कर्नाटकातील विजयपूर जिल्ह्यातील अवघ्या ९ महिन्यांच्या बाळावर ‘पीडिए डिव्हाईस क्लोजर’ आणि लातूर येथील ९१ वर्षांच्या ज्येष्ठ नागरिकावर ‘टॅव्ही’ ही अत्याधुनिक शस्त्रक्रिया करण्यात आली. या यशस्वी उपचारांची माहिती डॉ. सिद्धांत गांधी आणि डॉ. राहुल कारीमुंगी यांनी पत्रकार परिषदेत दिली.
९१ वर्षीय रुग्णावर अत्याधुनिक ‘टॅव्ही’ शस्त्रक्रिया
लातूर येथील वयोवृद्ध रुग्णाला दम लागणे, छातीत दुखणे व भोवळ या तक्रारी वाढल्या होत्या. तपासणीत हृदयातील झडप पूर्णपणे खराब झाल्याचे निष्पन्न झाले. पारंपरिक पद्धतीने शस्त्रक्रिया करणे धोकादायक असल्याने, पायातील रक्तवाहिनीतून झडप बदलण्याची ‘टॅव्ही’ प्रक्रिया करण्यात आली.डॉ. सिद्धांत गांधी आणि त्यांच्या टीमने कौशल्यपूर्ण पद्धतीने ही शस्त्रक्रिया पूर्ण केली. रुग्णाने उपचाराला उत्तम प्रतिसाद दिला असून सध्या त्यांची प्रकृती स्थिर आहे.
९ महिन्यांच्या बाळावर अवघड ‘पीडिए डिव्हाईस क्लोजर’
विजयपूर जिल्ह्यातील इंडी येथील ९ महिन्यांच्या बाळाच्या हृदयाला तब्बल ६ मिमीचे छिद्र असल्याचे निदान झाले होते. आर्थिक अडचणीमुळे पालकांना मोठ्या शहरांत उपचार करणे शक्य नव्हते. यावेळी डॉ. राहुल कारीमुंगी यांनी जागतिक स्तरावर वापरल्या जाणाऱ्या तंत्रज्ञानाचा वापर करीत, सोलापुरातच ७०% कमी खर्चात ही जटिल शस्त्रक्रिया यशस्वीरीत्या पार पाडली.बाळाचे वजन केवळ ४ किलो असल्याने धोका अधिक होता, तरीही उपचार यशस्वी ठरले. या दोनही शस्त्रक्रियांमुळे आंतरराष्ट्रीय दर्जाच्या हृदय उपचार सुविधा आता सोलापुरातच उपलब्ध असल्याचे सिद्ध झाले आहे, असे वैद्यकीय विशेषज्ञांनी सांगितले. एसीएस हॉस्पिटलच्या टीमचे सर्वत्र अभिनंदन होत आहे.
‘फ्युचर ऑफ कार्डियाक इंटरव्हेन्शन’ प्रदर्शन
हृदयरोग उपचारात येणाऱ्या भविष्यातील तंत्रज्ञानाची माहिती देण्यासाठी एसीएस हॉस्पिटलतर्फे भैय्या चौकात ‘फ्युचर ऑफ कार्डियाक इंटरव्हेन्शन’ प्रदर्शन आयोजित करण्यात आले आहे.यात अँजिओप्लास्टी, लेझर तंत्रज्ञान, ‘इंपेला’ यंत्र, फुफ्फुसातील रक्तगुठळ्या काढण्यासाठी ‘इनारील’ प्रणाली यांसह आधुनिक उपकरणांचे प्रात्यक्षिक मांडण्यात येणार आहे.सोलापूरकरांनी या प्रदर्शनास भेट द्यावी, असे आवाहन रुग्णालयाने केले आहे.
