सोलापूर जिल्ह्यात 16 जणांचा कोरोनाने मृत्यू

येस न्युज मराठी नेटवर्क : सोलापूर जिल्ह्यात बुधवारी रात्री बारा वाजेपर्यंत संपलेल्या चोवीस तासात नवीन ७१७ व्यक्तींना कोरोना ची बाधा झाल्याचे स्पष्ट झाले आहे. याच कालावधीमध्ये ४५३ व्यक्ती कोरोना आजारातून बऱ्या होऊन घरी परतल्या आहेत . २४तासात सोळा व्यक्तींचा कोरोनामुळे मृत्यू ओढवला आहे. त्यामध्ये माळशिरस तालुक्यातील धर्मपुरी , महाळुंगे आणि माळीनगर येथील प्रत्येकी एक, मंगळवेढा येथील नागणे गल्ली आणि दामाजी नगर येथील प्रत्येकी एक, माढा तालुक्यातील कुर्डूवाडी आणि भोसरे येथील प्रत्येकी दोन, बार्शी तालुक्यातील उपळाई ठोंगे आणि कोरफळे गावातील प्रत्येकी एक तसेच बार्शी शहरातील भवानी पेठ आणि नाईकवाडी प्लॉट येथील प्रत्येकी एक त्याचप्रमाणे दक्षिण सोलापूर तालुक्यातील गुंजेगाव आणि संगदरी येथील प्रत्येकी एक असे सोळा जण मृत्युमुखी पडले आहेत .करोनाच्या नवीन रुग्णांचा विचार केला तर पंढरपूर तालुक्यात सर्वाधिक १७१ त्यापाठोपाठ माळशिरस येथे १४६, करमाळा येथे ११२, माढ्यात ११० आणि बार्शी तालुक्यात ९८ नवीन व्यक्तींना कोरोना ची बाधा झाली आहे. पंढरपूर/ मंगळवेढा मतदारसंघात पोटनिवडणूक होत असून या तालुक्‍यात सर्वाधिक १७१ व्यक्तींना कोरोना झाला आहे. जिल्हा आरोग्य यंत्रणेवर ताण सातत्याने वाढत असून सध्या संपूर्ण जिल्ह्यात ६२५२ व्यक्तींवर कोरोनाची बाधा झाल्यामुळे विविध रुग्णालयात उपचार चालू आहेत. जिल्हा आरोग्य अधिकारी शीतलकुमार जाधव यांनी जिल्ह्यातील लोकांना मास्क वापरणे, वारंवार हात धुणे आणि सॅनिटायझर चा वापर सातत्याने चालूच ठेवण्याचे आवाहन केले आहे.