कोर्टकचेरीच्या झंझाट्यातून सुटण्यासाठी, दुरावलेले संबंध व प्रलंबित असलेल्या प्रकरणातून मुक्ती मिळवण्यासाठी सोलापुरात शनिवार दिनांक 13 डिसेंबर रोजी राष्ट्रीय लोक अदालत आयोजित करण्यात आली आहे.
या अदालती करिता कोणत्याही प्रकारची फी भरावी लागणार नसून या उलट न्यायाधीश, तज्ञ वकील व सामाजिक कार्यकर्ते यांचे पक्षकाराला मदत होणार आहे. या लोकन्यायालयाच्या निवाड्याविरुद्ध अपिलात जाता येत नाही. न्यायालयाच्या हुकूम नाम्याप्रमाणे लोकन्यायालयात होणाऱ्या निवड्यांची अंमलबजावणी कोर्टामार्फत करता येते. या अदालती मध्ये साक्षी – पुरावा, उलट तपासणी, दीर्घ युक्तिवाद या बाबी टाळल्या जातात. लोकन्यायालयात निकाली निघणाऱ्या प्रकरणांमध्ये कायद्यानुसार कोर्ट फी ची रक्कम परत मिळते, असे सर्व प्रकारचे फायदे या राष्ट्रीय लोक अदालतीमध्ये मिळणार आहेत.
या अदालतीत निगोशिएबल इन्स्ट्रुमेंट्स ॲक्टच्या कलम 138 खाली दाखल होण्यापूर्वीची प्रकरणे, बँक वसुली प्रकरणे, कामगार वाद प्रकरणे, वीज व पाणी यांच्या देयकाबाबतची प्रकरणे, फौजदारी प्रकरणे, वैवाहिक व इतर दिवाणी प्रकरणे, पैसे वसुलीचे प्रकरणे, अपघात न्यायाधीकरणाबाबतची प्रकरणे, वैवाहिक वादाबाबतची प्रकरणे, भूसंपादन बाबतची प्रकरणे, नोकरी बाबतची प्रकरणे ज्यामध्ये पगार, इतर भत्ते व निवृत्ती बाबतचे फायदे, महसूल बाबतची प्रकरणे, बौद्धिक मालमत्ता अधिकार प्रकरणे अशा सर्व प्रकरणांचा समावेश आहे. 2024 पासून या राष्ट्रीय अदालतीमध्ये एकूण 75 लाख 60 हजार 29 प्रकरणे निकाली काढण्यात आलेली आहेत.
अधिक माहितीसाठी सोलापुरातील 85 91 90 36 13 या क्रमांकावर संपर्क साधावा.
