सोलापूर : उध्दव बाळासाहेब ठाकरे शिवसेनेचे जिल्हाप्रमुख अमर पाटील, माजी मंत्री उत्तमप्रकाश खंदारे, माजी आमदार रतिकांत पाटील सचिन चव्हाण यांच्यासह इतर पदाधिकारी व शिवसैनिकांनी गुरुवारी रात्री मुंबईत उपमुख्यमंत्री एकनाथ शिंदे यांच्या उपस्थितीत शिवसेना शिंदे गटात प्रवेश केला.
राज्याचे उद्योग मंत्री उदय सामंत यांच्या शासकीय निवासस्थानी हा प्रवेश सोहळा पार पडला. यावेळी माजी आमदार शहाजी पाटील, संपर्क प्रमुख महेश साठे, प्रवक्त्या प्रा. ज्योती वाघमारे, जिल्हा प्रमुख मनिष काळजे आदी उपस्थित होते.
प्रत्येक ठिकाणी पक्ष संघटन मजबूत करण्यासाठी काम करावे. आगामी स्थानिक स्वराज्य संस्थांच्या निवडणुकीत शिवसेनेचे सर्वाधिक उमेदवार विजयी होण्याच्या दृष्टीने काम करा. पक्षात प्रामाणिकपणे काम करणाऱ्याला संधी निश्चितपणे मिळेल, त्यामुळे कोणीही मनामध्ये किंतु-परंतु न ठेवता पक्ष वाढीसाठी जोमाने काम करा, अशा सूचना उपमुख्यमंत्री एकनाथ शिंदे यांनी यावेळी पक्षात प्रवेश केलेल्या पदाधिकाऱ्यांना दिल्या. आगामी निवडणुकीत पक्षाचे सर्वाधिक नगरसेवक निवडून आणण्यासाठी काम करण्याच्या सूचनाही केल्या.
तसेच राज्याच उप मुख्यमंत्री एकनाथ शिंदे यांच्या शिवसेनेच्या सोलापूर शहर प्रमुखपदाची जबाबदारी सचिन मोहन चव्हाण यांच्यावर सोपवण्यात आली आहे. आगामी महापालिका निवडणुकीच्या पार्श्वभूमीवर ही नियुक्ती केली असून सर्वाधिक नगरसेवक निवडून आणण्यासाठी काम करण्याच्या सूचना शिंदे यांनी केल्या.
