सोलापूर : वालचंद इन्स्टिट्यूट ऑफ टेक्नॉलॉजी (डब्ल्यु.आय.टी.) येथील मेकॅनिकल इंजिनिअरिंग शाखेतील प्रा. नागेश तंबाके यांनी “डेटा ड्रिव्हन कंडिशन मॉनिटरिंग ऑफ सी.एन.सी. हॉबिंग कटर : अ मशीन लर्निंग अॅप्रोच” या विषयावर सोलापूर पुण्यश्लोक अहिल्यादेवी होळकर सोलापूर विद्यापीठाकडून पीएच.डी. पदवी मिळवली आहे.
डॉ. भाग्येश देशमुख यांच्या मार्गदर्शनाखाली आणि लक्ष्मी हायड्रॉलिक्स प्रा. लि. यांच्या प्रायोजकत्वाखाली पार पडलेल्या या संशोधनातून औद्योगिक यंत्रसामग्रीचे रिअल-टाइम निरीक्षण करून बिघाड कमी करणे, खर्च व ऊर्जा बचत साधणे आणि सुरक्षितता वाढविणे शक्य झाले आहे.
डॉ. तंबाके यांनी संशोधन काळात ५ आंतरराष्ट्रीय संशोधन निबंध प्रकाशित केले असून त्यापैकी ३ एस.सी.आय. तर २ स्कोपस निर्देशांकित जर्नलमध्ये प्रसिद्ध झाले आहेत. तसेच, विद्यापीठस्तरीय अविष्कार स्पर्धेत त्यांना विशेष पारितोषिक मिळाले आहे.
त्यांच्या या उल्लेखनीय यशाबद्दल वालचंद शिक्षण समूहाचे विश्वस्त, प्राचार्य डॉ. विजय आठवले आणि विभागप्रमुखांनी मनःपूर्वक अभिनंदन करून पुढील वाटचालीस शुभेच्छा दिल्या आहेत.
