महिलांकडून अश्लील हावभाव व नृत्य; १५ महिला आणि ग्राहकांकडून २८.२५ लाखांचा मुद्देमाल जप्त…
सोलापूर : सोलापूर ग्रामीण पोलिसांनी अवैध धंदे, डान्सबार तसेच सार्वजनिक ठिकाणी कायदा व सुव्यवस्थेला बाधा निर्माण करणाऱ्यांविरोधात कारवाईची मोहीम तीव्र केली आहे. त्याचाच भाग म्हणून विशेष पथकाने भोेगाव, ता. उत्तर सोलापूर येथील ‘सुखसागर ऑर्केस्ट्रा बार’वर छापा टाकला. ६ सप्टेंबर रोजी रात्री सव्वाबारा वाजण्याच्या सुमारास केलेल्या या कारवाईत महिला अंगावर तोकडे कपडे परिधान करून अश्लील हावभाव करीत हिंदी व मराठी गाण्यांवर नृत्य करत असल्याचे पोलिसांच्या निदर्शनास आले. तसेच ग्राहकांकडून महिलांवर नोटा उधळल्या जात असल्याचेही आढळले.
कारवाईदरम्यान १५ महिला व ग्राहकांची चौकशी करून त्यांची नावे-पत्ते निष्पन्न करण्यात आले. घटनास्थळावरून रोख रक्कम, मोबाईल हँडसेट व इतर साहित्य असा एकूण २८ लाख २५ हजार ०९० रुपयांचा मुद्देमाल जप्त करण्यात आला. या प्रकरणी संबंधित चालक, मालक, व्यवस्थापक तसेच अश्लील नृत्य करणाऱ्या महिलांविरुद्ध भारतीय न्याय संहिता कलम २९६, २२३(३)(४), महाराष्ट्र पोलीस अधिनियम तसेच महाराष्ट्र हॉटेल, उपहारगृहे व मद्यपान कक्षातील नृत्य व अश्लील नृत्यावर प्रतिबंध घालण्याबाबतच्या कायद्यानुसार कारवाई करण्यात आली आहे.
ही कारवाई पोलीस अधीक्षक अतुल कुलकर्णी, अपर पोलीस अधीक्षक विजय कबाडे यांच्या मार्गदर्शनाखाली उपअधीक्षक गणेश शिंदे यांच्या नेतृत्वाखाली विशेष पथकाने केली. सोलापूर तालुका पोलिस ठाण्याचे अधिकारी व अंमलदारांनीही कारवाईस सहकार्य केले.
पोलीस अधीक्षकांचा इशारा : सोलापूर ग्रामीण जिल्ह्यात कोणत्याही स्वरूपाचे अवैध धंदे, नियमबाह्य डान्सबार, अश्लील नृत्य अथवा कायदा-सुव्यवस्थेला बाधा निर्माण करणारे प्रकार खपवून घेतले जाणार नाहीत. अशा प्रकारात सहभागी तसेच प्रत्यक्ष-अप्रत्यक्ष मदत करणाऱ्यांविरुद्ध कठोर कायदेशीर कारवाई केली जाईल.
