सोलापूर : सोलापूर जिल्ह्यातील सांगोल्यातून एक वेदनादायक घटना समोर आलीय. घरात खुंटीशी खेळत असताना एका चिमुकल्याला जीव गमवावा लागलाय. खुंटीशी खेळत असताना अचानक अंगावरील स्वेटरची दोरी खुंटीत अडकली आणि फास लागून त्या चिमुकल्याचा मृत्यू झाला. एका नऊ वर्षाच्या मुलाचा दुर्दैवी मृत्यू झाल्यानं परिसरातही शोककळा पसरलीय. सोलापुरातील सांगोला तालुक्यातील अचकदाणीतील माळीवस्ती येथे ही दुर्दैवी घटना घडली आहे. या दुर्घटनेत सोहम जगन्नाथ शेंडे या नऊ वर्षीय चिमुकल्याचा मृत्यू झालाय. त्यामुळे त्याच्या आई-वडिलांवर दुःखाचा डोंगर कोसळलाय. मुलगा खेळाच्या नादात जीवानिशी गेल्यानं आईवडीलही पुरते कोसळून गेलेत.
खेळताना अचानक स्वेटरमधील दोरी खुंटीमध्ये अडकली
थंडीचे दिवस असल्याने सोहम याने अंगामध्ये स्वेटर घातलेला होता. घरातील पलंगाच्या वरील बाजूस असलेल्या मोठ्या खुंटीशी तो खेळत होता. खेळताना अचानक स्वेटरमधील दोरी खुंटीमध्ये अडकली आणि त्यास फास लागला. जोराचा फास लागल्याने त्याचा जागीच मृत्यू झाला. शेजारील मित्र त्यास खेळायला बोलवण्यासाठी आले तेव्हा हा प्रकार उघडकीला आला.
गेल्या काही दिवसांपासून मुलांना खेळताना काही गोष्टींचं गांभीर्य समजत नसल्यानं दुखापतीच्या अनेक घटना समोर येत आहेत. बऱ्याचदा मुलं स्पायरड मॅन वगैरे पाहून तशाच प्रकारची कृती करण्याचा प्रयत्न करतात आणि दुखापतग्रस्त होतात. त्यामुळे पालकांनीही वेळीच मुलांकडे लक्ष देण्याची वेळ आली आहे. तसेच पब्जी किंवा इतर गेम्सचाही मुलांच्या प्रकृती स्वास्थ्यावर वाईट परिणाम होत असल्याचंही वारंवार निदर्शनास आलंय.
