पहिल्यांदाच महिलांचे बचाव पथक; ‘ रेड क्रॉस च्या माध्यमातून वैद्यकीय पथक उपलब्ध झाल्यास बोट ॲम्ब्युलन्स’ तयार असेल
जिल्हाधिकारी एस. कार्तिकेयन यांच्या अध्यक्षतेखाली तर अपर जिल्हाधिकारी गणेश निऱ्हाळी व निवासी उपजिल्हाधिकारी अभिजीत पाटील यांच्या मार्गदर्शनाखाली जिल्हा आपत्ती व्यवस्थापन प्राधिकरण दक्ष आहे.
पंढरपूर, दि. २०: आषाढी वारीच्या पार्श्वभूमीवर चंद्रभागा नदी व पालखी मार्गावर भाविकांच्या सुरक्षिततेसाठी सोलापूर जिल्हा आपत्ती व्यवस्थापन प्राधिकरणाने व्यापक आपत्कालीन यंत्रणा सज्ज केली आहे. यंदा पहिल्यांदाच सोलापूर जिल्ह्याचे स्वतःचे महिलांचे बचाव पथक वारीत सहभागी होणार आहे.
आपत्कालीन साहित्य सज्ज
आपत्कालीन व्यवस्थेकरिता सहा अग्निशमन वाहने आणि एक रेस्क्यू व्हॅन तैनात करण्यात आली आहे. रेस्क्यू व्हॅनचे इनचार्ज पंढरपूर नगरपालिकेचे अग्निशमन अधिकारी संभाजी कारले आहेत. प्रवासी वाहतूक करणाऱ्या होड्यांसाठी एक हजार पंचेचाळीस लाईफ जॅकेट उपलब्ध करून देण्यात आले असून यासाठी जलसंपदा विभागाचे उपविभागीय अभियंता जेडे समन्वयक म्हणून काम पाहत आहेत. सोलापूर जिल्ह्यातील अकरा, पुणे जिल्ह्यातील दोन आणि एनडीआरएफच्या चार अशा एकूण सतरा रेस्क्यू बोटी तैनात करण्यात आल्या आहेत. रेस्क्यू बोटीसाठी शंभर लाईफ जॅकेट, तीस लाईफ रिंग, नऊ वॉकी-टॉकी, पाच मेगाफोन, चार इन्फ्लेटेबल टेंट, सहा मिमी स्टॅटिक रेस्क्यू रोप, पाच टॉर्च, दोन लेजर पॉइंटर व दोन लाईट बॅटन अशी सामग्री सज्ज ठेवण्यात आली आहे. या संपूर्ण यंत्रणेचे इनचार्ज जिल्हा आपत्ती व्यवस्थापन अधिकारी शक्तीसागर ढोले आहेत.
चंद्रभागेत १८० आपदा मित्रांचे नियोजन
चंद्रभागा नदीत गस्त व बचाव कामासाठी एकूण एकशे ऐंशी आपदा मित्रांचे नियोजन करण्यात आले आहे. यामध्ये एनडीआरएफचे तीस जवान, ठाणे आपदा मित्रचे दोन, वाशीम जिल्हा आपदा मित्रचे दहा, आपत्ती संघ पिंपरी-चिंचवडचे दहा, वन्यजीव रेस्क्यू पुणेचे दहा, मुळशी आपत्ती समिती पुणेचे दहा, हेल्पिंग हँड शिरोळ कोल्हापूरचे वीस, सारथी फाउंडेशन सोलापूरचे दहा, चंद्रभागा रेस्क्यू फाउंडेशन कान्हापुरी जि. सोलापूरचे दहा, पंढरपूर शहरातील आदिवासी रेस्क्यू कोळी समाज होडीवाल्यांचे तीस, रेड फेरी ग्रुप सोलापूर या महिला रेस्क्यू पथकातील पंधरा, महाराष्ट्र रेस्क्यू फाउंडेशन पंढरपूरचे पाच आणि सोलापूर जिल्ह्यातील वीस पोलिस पाटील यांचा समावेश आहे. यासोबतच वारी कालावधीसाठी दोन मेकॅनिक पंढरपूरमध्ये तैनात करण्यात आले आहेत.
पहिल्यांदाच महिलांचे बचाव पथक
आषाढी वारीत पहिल्यांदाच महिलांचे बचाव पथक सोलापूर जिल्ह्याचे स्वतःचे असणार आहे. या पूर्वी या पथकाने २०२५ मधील सीना नदीच्या पुरात दक्षिण सोलापूर तालुक्यातील ३०० नागरिकांच्या बचाव कार्यात सिंहाचा वाटा उचलला होता. तसेच कार्तिक वारी, २०२५ मधील चैत्र व माघ वारीतही या पथकाने बचाव कार्य केले आहे.
बोट ॲम्ब्युलन्सचे नियोजन
रेड क्रॉसच्या माध्यमातून वैद्यकीय पथक उपलब्ध झाल्यास बोट ॲम्ब्युलन्स तयार असेल , अशी माहिती जिल्हा आपत्ती व्यवस्थापन अधिकारी शक्तीसागर ढोले यांनी दिली. चंद्रभागा नदीपात्र व घाट परिसरात कोणतीही अनुचित घटना घडू नये यासाठी यंत्रणा २४ तास दक्ष राहणार आहे.
