रे नगरच्या निधीचा प्रस्ताव राज्य शासनाच्या मंत्रिमंडळात मंजुरीचा निर्णय घेऊन केंद्र सरकारकडे पाठवणार; विभागीय आयुक्तांचे आश्वासन !
सोलापूर : रे नगर च्या पायाभूत व मूलभूत सुविधांसाठी निधीचा प्रस्ताव रे नगर फेडरेशनकडून दिलेला असून या संबंधी तातडीने राज्य शासनाच्या मंत्रिमंडळात मंजुरीचा निर्णय घेऊन केंद्र सरकारकडे पाठविण्याचे ठोस आश्वासन विभागीय आयुक्त मा.सौरव राव यांनी कुंभारी येथे साकारत असलेल्या ३० हजार असंघटीत कामगारांच्या घरकुलांची पाहणी केल्यानंतर दिले.
रे नगर च्या लाभार्थ्यांना ९ ऑगस्ट २०२२ पर्यंत पहिल्या टप्प्यातील १० हजार घरे देण्याचे अभिवचन पूर्ण करण्यासाठी मुलभूत व पायाभूत सुविधांकरिता साधारणत ३५० कोटी रुपये निधीची आवश्यकता असून यामध्ये पिण्याचे पाणी व ड्रेनेज करिता २०० कोटी रुपये, वीजेकरिता ५३ कोटी रुपये, रस्त्यांकरिता ५० कोटी रुपये, शाळा व महाविद्यालय, हॉस्पिटल, खेळाचे मैदान, स्मशानभूमी, भाजी मंडई, प्रार्थनास्थळ, अभ्यासिका, समाज मंदिर, व्यायामशाळा इत्यादी करिता ३५ कोटी रुपये लागणार आहे. यामध्ये लाभार्थी स्वतः २० टक्केची भागीदारी करणार आहेत. याकरिता विभागीय आयुक्त यांनी रे नगर च्या पायाभूत व मूलभूत सुविधांसाठी निधीचा प्रस्ताव राज्य शासनाच्या मंत्रिमंडळात मंजुरीचा निर्णय घेऊन केंद्र सरकारकडे पाठविण्याची मागणी रे नगरचे मुख्य प्रवर्तक तथा माजी आमदार कॉ. नरसय्या आडम (मास्तर) यांनी सोमवार दि. १५ मार्च २०२२ रोजी रे नगर येथे झालेल्या बैठकीत केली. कुंभारी येथे साकारत असलेल्या पंतप्रधान आवास योजना अंतर्गत 30 हजार असंघटीत कामगारांचा महत्वाकांक्षी गृहनिर्माण प्रकल्पाची रे नगर ची विभागीय आयुक्त सौरव राव यांच्याकडून सोमवार १५ मार्च रोजी पाहणी करण्यात आली.
यावेळी जिल्हाधिकारी मिलिंद शंभरकर, सोलापूर जिल्हा परिषद मुख्य कार्यकारी अधिकारी दिलीप स्वामी, सोलापूर महानगरपालिका आयुक्त पी.शिवशंकर, मुख्य प्रवर्तक माजी आमदार कॉ.नरसय्या आडम (मास्तर), सहा.जिल्हाधिकारी मनीषा आव्हाळे, उपजिल्हाधिकारी उदमले, म्हाडा चे कार्यकारी अधिकारी नितीन माने, तहसीलदार व संबंधित अधिकारी, रे नगर फेडरेशन चे चेअरमन नलिनी कलबुर्गी, सचिव युसूफ शेख मेजर, नगरसेविका कामिनी आडम, मुरलीधर सुंचू, यशोदा दंडी, विजयलक्ष्मी महेशन, लता सारंगी, रंगप्पा मरेड्डी, शंकर गड्डम, लक्ष्मण माळी, वीरेंद पद्मा, संदीप रेऊरे, अभियंता मेहुल मुळे, संदीप झाकणे, लाभार्थ्यांना गृहकर्ज पुरवठा करणे बँकेचे अधिकारी बैठकीला उपस्थित होते.
यावेळी मुख्य प्रवर्तक माजी आमदार कॉ. नरसय्या आडम व रे नगर फेडरेशनचे चेअरमन कॉ. नलिनीताई कलबुर्गी, सेक्रेटरी कॉ. युसुफ शेख (मेजर) यांच्या हस्ते विभागीय आयुक्त सौरव राव व अन्य मान्यवर अधिकाऱ्यांचा सत्कार करण्यात आला. या कार्यक्रमाचे सूत्रसंचालन आणि आभार प्रदर्शन कॉ. अनिल वासम यांनी केले.
