सोलापूर- पुण्यश्लोक छत्रपती श्री शिवाजी महाराज कि जय च्या जयघोषात हिंदवी स्वराज्य स्वातंत्र्य दिन अर्थात श्री शिवराज्याभिषेक दिनानिमित्त देवदर्शन पालखी पदयात्रा मोठ्या उत्साहात काढण्यात आली. शनिवारी सायंकाळी श्री शिवराज्याभिषेक सोहळा समितीतर्फे या पदयात्रेचे आयोजन करण्यात आले होते.
हिंदवी स्वराज्याचे संस्थापक छत्रपती श्री शिवाजी महाराज यांचा राज्याभिषेक झाल्यानंतर श्री शिवछत्रपती देवदर्शनासाठी बाहेर पडले होते. हीच श्रद्धा मनात ठेवून श्री शिवराज्याभिषेक सोहळा समितीतर्फे दरवर्षी देवदर्शन पदयात्रा काढण्यात येते.
ग्रामदैवत श्री सिद्धरामेश्वर मंदिरापासून या देवदर्शन पदयात्रा पालखी सोहळ्यास प्रारंभ झाला. ग्रामदैवत श्री सिद्धरामेश्वरांचे दर्शन घेऊन ही पालखी मिरवणूक डॉ. बाबासाहेब आंबेडकर चौक, चार हुतात्मा पुतळा, सरस्वती चौक, मेकॅनिकी चौकमार्गे छत्रपती श्री शिवाजी महाराज चौकात विसर्जित झाली.
मिरवणुकीच्या अग्रभागी पूजन केलेला भगवा ध्वज होता. त्यामागे श्री शिवराज्याभिषेक सोहळा समितीचे लेझीम पथक होते. त्यामागे सजवलेल्या पालखीत पुण्यश्लोक छत्रपती श्री शिवाजी महाराजांची मूर्ती ठेवण्यात आली होती. यावेळी लेझीम पथकातील शिवभक्तांनी लेझीमचे बहारदार डाव सादर करत उपस्थितांच्या डोळ्यांचे पारणे फेडले. ढोल ताशांच्या तालावर सादर झालेल्या लेझीमच्या सादरीकरणामुळे सोलापूरकरांनी ठेका धरला. ही देवदर्शन पदयात्रा पालखी मिरवणूक पाहण्यासाठी सोलापूरकरांनी मोठी गर्दी केली होती.
यावेळी श्री शिवराज्याभिषेक सोहळा समितीचे शिवभक्त मोठ्या संख्येने उपस्थित होते.
