पुणे ते मुंबई प्रवास करणाऱ्या प्रवाशांचे विशेष प्रेम असणाऱ्या ‘दख्खनची राणी’ अशी ओळख असलेल्या डेक्कन क्वीनचा 97 वा वाढदिवस आज मोठ्या उत्साहात साजरा करण्यात आला. प्लॅटफॉर्म क्रमांक एकवर रेल्वे प्रवासी ग्रुपच्या अध्यक्षा हर्षा शाह यांच्यावतीनं आणि दरवर्षी पुणे ते मुंबई प्रवास करणाऱ्या प्रवाशांच्या उपस्थितीत केक कापला. यावेळी ढोल ताशांच्या गजरात डेक्कन क्वीनचा वाढदिवस साजरा करण्यात आला.
1 जून 1930 साली पुणे ते मुंबई डेक्कन क्वीन सुरू करण्यात आली. या डेक्कन क्वीनमुळे पुणेकरांचा मुंबईपर्यंत प्रवास हा सुखकर झाला. डेक्कन क्वीनचा हा इतिहास म्हणजे दोन शहरांना जोडणाऱ्या प्रवासाची कहाणी आहे. डेक्कन क्वीनच्या ‘वेळेवर निघणे’ आणि ‘वेळेवर आगमन’ यामुळे या रेल्वेची एक विशेष ओळख निर्माण झाली आहे. टेबल सर्व्हिस, मायक्रोवेव्ह ओव्हन, डीप फ्रीजर आणि टोस्टरसारख्या आधुनिक पेंट्री सुविधांसह डायनिंग सुविधा असलेली ही एकमेव रेल्वे आहे. डायनिंग कारमध्ये कुशन केलेल्या खुर्च्या आणि कार्पेटदेखील आहेत. गेल्या 96 वर्षांच्या इतिहासात ही रेल्वे दोन शहरांमधील वाहतुकीचं फक्त एक साधन राहिलेली नाही. तर अत्यंत निष्ठावंत प्रवाशांच्या पिढीला जोडणारी संस्था बनली आहे. या रेल्वेतून हजारो प्रवासी रेल्वेतून दररोज पुणे ते मुंबई असा प्रवास करत असतात.
